Vawiin khan Lunglei West Cluster ami Industry Sector hnuaia Trade hrang hrang thlangtute hnenah NLUP 2nd Phase 3rd Installment chu DIC Conference Hall, Lunglei-ah sem a ni a. NLUP tanpuina semnaah hian Lunglei West Bialtu LA Pu Chalrosanga Ralte chu Khuallian niin Lunglei DC Pu Ashish Madhaorao More, IAS chu Khual Zahawm a ni bawk.

NLUP 2nd Phase 3rd Installment semna inkhawm DIC Lunglei Genenral Manager Pu Lalnuntluanga kaihhruaiah Khuallian Pu Chalrosanga Ralte chuan sorkar hotute rel angin Industry Trade thlangtute chauh tanpuina pek hrih nise tih a nih angin Lunglei District huamchhunga Industry trade thlangtute chu tanpuina sem mek a ni a, vawiina tanpuina dawngtu beneficiaries-te pawh a vanneih zingah an tel a ni, a ti. Sorkarin miretheite dinhmun tha zawka chawikan an nih theihna tura NLUP hi chhawpchhuah a nih angin, tanpuina dawngtute pawh rinawm leh taima taka hma la zel turin a chah a. NLUP dawngtute zingah ti tha duh lo, tanpuina dawng zel tlak lo mi engemawzat an awm chu pawi a tih thu a sawi bawk a. NLUP officials leh hnathawkte taimakna leh inpekna chu fakin Pu Chalrosanga chuan mahni tana engmah hamthatna beisei lova mipuite tana an rawngbawlna hi a chawiawi hle a ni, a ti bawk.

Lunglei DC Pu Ashish Madhaorao More pawhin thu sawiin sorkar tan chuan NLUP beneficiary tinte an pawimawh a, chuvangin tanpuina dawngtute pawhin an tanpuina dawnte chu mahni chhungkua theuh dinhmun tihchangtlun nan hmang chho zelin, sorkar thiltumte tihhlawhtlinpui an tum theuh tur a ni a, chu chuan kan khawtlang leh ram pawh a chawikang zel dawn a ni, a ti.

Industries IPO Pu R.Vanlalsanga IPO-in tanpuina dawn chhan leh hman dan tur chungchang report tlangpui a sawi a. Vawiin inkhawmah khan Khuallian Pu Chalrosanga Ralte leh Khual Zahawm Pu Ashish More ten tanpuina Lunglei ‘W’ Cluster-a mi 143 te hnenah cheque-in an hlan a; a vaia pawisa semchhuah chu Rs.42,50,000/- (Cheng Nuai sawmli Pahnih leh Singnga) a ni. Lunglei West Cluster NLUP (Industry Sector) 2nd Phase 3rd Installment sem dan chu a hnuaia mi ang hi a ni :

1. Automobile Works : Mi 3 hnenah Rs.31,000/- theuh (Total = Rs.93,000/-)

2. Bakery : Mi 1 hnenah Rs.36,000/-

3. Broom Making-I : Mi 1 hnenah Rs.40,000/-

4. Chow Making : Mi 1 hnenah Rs.31,000/-

5. Electronic Repairing : Mi 2 hnenah Rs.30,000/- (Total=Rs.60,000/-)

6. Hair Cutting : Mi 4 hnenah Rs.30,000/- theuh (Total=Rs.1,20,000/-)

7. Leather & Hood Works : Mi 1 hnenah Rs.32,000/-

8. Petty Trade-I : Mi 118 hnenah Rs.30,000/- theuh (Total=Rs.3,540,000/-)

9. Petty Trade : Mi 1 hnenah Rs.35,000/-

10. Steel Fabrication : Mi 1 hnenah Rs.33,000/-

11. Tailoring : Mi 10 hnenah Rs.23,000/- theuh (Total=Rs.2,30,000/-)

Lunglei West Cluster atang hian Trade thlana hma la tha tawk lo leh pem bo avangin mi 29 te chu an tanpuina dawn tur hrensak (withheld) an ni a, hma an lak dan a zirin pek leh theih an ni ang.