Chief Minister Pu Lal Thanhawla hoin vawiin khan a office cabinet room-ah Mizoram State E-Governance Council Committee in meeting vawi 1-na an nei.

Chief Minister chuan thuhma tawi a sawiah ram leh mipui tana hmasawnna sorkarin a kalpui thin ah a rah dawng tur ten an hmuh ngeina turin a pekchhuahna delivery mechanism ngaih pawimawh a tul thu a sawi a. Hmasawnna hna tha taka a kal theihna turin hna vil uluk leh endik a pawimawh bawk thu a sawi a, a bikin thingtlang lam hmasawnna tur hnathawhte chu vil uluk leh ngunthluk taka endik bik tul a tih thu a sawi bawk a ni.

Meeting-ah hian Information & Communication Technology (ICT) Department in project hrang hrang pasarih a kalpuite chu thlirletna neih a ni a. Agenda an chhawpchhuahte zingah State contribution for ‘Improvement of Government Administrative Process and Quality Service Delivery Mechanism’ under World Bank tih ah Plan Budget ah ICT department tan counterpart funding dah nise tih sawiho a ni a. Sorkar hnathawk tin ten Information Technology (IT) thiamna bulthut (basic skills) tal thiam a, a bikin hna hmu hlim ten he thiamna hi nei ngei se an ti bawk a. IT in chak zawka hma a sawn theihna turin Plan Budget 2-3% vel dah hran nise tih an sawiho bawk a. Sorkar department hrang hrang ten IT tangkai taka hman anih theih nan IT Cadre siam a, hei hi Central sorkar hnuaia National Informatics Centre (NIC) zulzuia ruahman nise tiin, meeting chuan han tih phawt chu tha an ti a. Heng bakah hian ICT Department in kum 5 chhunga an kal dan tur Road Map an buatsaih chu an sawiho bawk a. Prime Minister Narendra Modi in Digital India Project kalpui tura Rs.1 lakh Crore senna tur a duan pawh sawiho a ni bawk a ni.

E-Governance Council Committee ah hian Chief Minister chu Chairman a ni a, ICT Minister chu Vice Chairman leh Member Secretary chu ICT Secretary a ni.

Meeting-ah hian Pu H.Liansailova, Vice Chairman, State Planning Board, Pu Lal Thanzara, Minister of State for ICT, Pu Lalmalsawma,IAS, Chief Secretary, Pu C.Lalhmachhuana, Secretarry,ICT leh Pi Nandini Paliwal, IAS, Special Secretary, Planning te an tel a ni.