Vawiin khan Model English School, Lunglawn chuan kum 100 an tlin lawmna ‘Centenary Celebration’ an nei a, Education Parliamentary Secretary Pu Joseph Lalhimpuia’n Centenary lawmna hi a hmanpui a ni.

Centenary lawmna inkhawm School Centenary Celebration Comittee Vice-Chairman Pu K.Kaisanga Ralte kaihhruaiah Khuallian Pu Joseph Lalhimpuia chuan Model English School, Lunglawn kum 100 hial a tlin theih nana thahnemngai taka thawktu zawng zawngte fakin he hun hlu tak a hmanpui tura an sawm avangin lawmthu a sawi a ni. Zirlai mahni nu leh pa leh zirtirtute thu ngai pawimawha awih thinte chu mi hlawhtling an ni duh tiin zirlaite a fuih a, zuk leh hmuam lakah insum turin zirlaite chu a chah bawk a ni. Zirtirtute chu zirlai naupangte bula hun tam ber hmangtute an nih avangin an nunchang uluk leh chetziaah fimkhur chu an mawhphurhna lian tak a ni a; ram leh hnam tana mi tangkai leh ropui tak tak chher theitu an ni tih inhre reng turin a chah bawk a ni.

Parliamentary Secretary tawiawmtu Pu K.Rohmingthanga, Secretary chuan Centenary hriatrengna ‘monument’ a hawng a. Model English School, Lunglawn-ah hian zirlai 200 chuang an awm mek a, zirtirtu 12 an thawk mek bawk a ni.