Vawiin dt 11th December, 2014 hian Pu John Rotluangliana, Transport Minister hovin a office chamber ah Commercial Vehicle Joint Action Committee ten Bandh an huaihawt chungchang thlirletna neih a ni a. He hunah hian Transport Minister Pu John Rotluangliana chuan CVJAC ten darkar 72 chhung Total Bandh huaihawt an tum nimin tlai dar 5:00 a tihtawp tak chhan an sawi chungchang sawiin sorkarin CVJAC te hi sorkar in a be lova, ziakin engmah kan tiam lova, biak pawh kan tum lo a ti. Hetianga dawt hmanga inpuh hi thil tenawm tak a nih thu a sawi bawk. Minister chuan CVJAC ten Total Bandh an neih avanga mipuiten harsatna an tawh loh nana sorkar hmalakna tha taka tawiawmtu, Police Department, Aizawl DC, Transport Department, Traffic Security te chungah lawmthu a sawi rualin sorkar thlawptu mipui zawng zawngte chungah lawmthu a sawi tak meuh meuh a, a bik takin Maxi Cab Owner Association leh Pick-up Owner Association te chungah sorkar hmalakna an thlawp avangin lawmthu a sawi bawk.

Hetih rual hian CVJAC te bandh neih chhunga harsatna tawkte mipuite chungah an hriatthiamna a ngen nghal bawk.

He meeting ah hian Pu Hrangtawna, Transport Secretary; Dr. Franklin Laltinkhuma, DC; Pu C. Laldina SP Aizawl leh Traffic bakah Transport Department hotute an tel a ni.