Vawiin khan Lunglei Saikuti Hall-ah NLUP 2nd Phase (2nd Installment) sem a ni a, he hunah hian LAD Minister Pu P.C. Lalthanliana chu Khuallian niin Pu Joseph Lalhimpuia, Vice Chairman HPC Lunglei chu Khualzahawm a ni.

NLUP 2nd Phase semna inkhawm Lunglei DC Pu V. Sapchhunga kaihhruaiah Khuallian Pu P.C.lalthanliana chuan thu sawiin NLUP chu sawiselna karah sorkarin Zoram dung leh vangah a sem zel a, tunah chuan a rah tha a takin a lang tan ta a ni, a ti. Mirethei ten sorkarah ‘budget’ an nei lo a, sorkarin kuthnathawktuten leirem an reh theihna turin budget a dahsak a, chumi atang chuan NLUP hi sem a ni, a ti. NLUP hi vawiin atan chauh a ni lo a, hmathlir thui tak nei a, rinawmna leh taihmakna nen tihlawhtling theuh turin kalkhawm te a chah bawk. NLUP dawngtu theuh ten a hlawhtlinna kawngah mawh an phur theuh a, NLUP hlawhtlinna chuan ram sum leh pai dinhmun pawh a tih san ngei a beisei thu a sawi. Mirethei leh kuthnathawktu te an intundin theih nan sorkarin theihtawp chhuah a inhuam zel thu a sawi bawk a ni.

Khualzahawm Pu Joseph Lalhimpuia pawhin thu sawiin kum 2008 inthlana manifesto bawhzuiin NLUP chu a takin sem chho zel a ni a, a rah pawh tam tak seng mek hmuh tur a awm tawh a ni, a ti. Zoram ngahfak kuthnathawktute hi sorkarin a ngaihtuah a, chhungkua 1,20,000 hnenah Prime Minister Special Pakage atanga dawn Cheng vaibelchhe 28.13 chu sem a ni, a ti. Rinawmna leh thawhrimna tello chuan a hlawhtlin theih loh a, chuvangin NLUP dawngtu ten Zoram a lo intodelh theih nan leh kan Zoram alo nawm zawk theih nan nasa taka tan kan lak tlan a tul hle a ni, a ti bawk. Chhumchhia ram leh hmun nei si, hrisel lohna avanga thawk theilo te tan ‘Chief Minister’s Asistance for NLUP’ pek tum a nih thu a sawi bawk.

Hun khar nan Dist. Level NLUP implementing Committee DAO leh Secretary Pu R.Lalnunzira, chuan lawmna thu a sawi a. NLUP Flagship Programme-ah hian Lunglei District-ah Cluster 7 awmin, Line Department 8-in 1st Phase-ah chhungkua 7103 hnenah tanpuina an sem tawh a; 2nd Phase ah vawiin khan chhungkaw 7408 te hnenah tanpuina sem leh a ni.