Nimin chawhnu  dar 1 khan Circuit House Conference  Hall  Lunglei  ah  NLUP chungchang  meeting  Agriculture  Minister Pu H.Liansailova  hovin neih a ni. He meeting Lunglei Bawrhsap Pi M. Zohmingthangi kaihhruai-ah hian Minister Pu Liansailova chuan thu sawiin, sawrkarin NLUP a kalpui mekah Lunglei  District chu entawntlak ber an ni tiin, District bawrhsap leh Line Department hotute thawhrimna leh hmalakna ah lawmthu a sawi bawk a ni. Sawrkar hmalakna pawimawh Flagship Programme tih hlawhtlinna tura bialtu MLA theuh te thahnem ngaihna pawh Minister hian lawmawm a tih thu sawi bawkin, hun tha kan neih lai hian, theih tawp kan chhuah a, tih tak takna nen kan beih a tul a ni tiin, monitoring te pawhin theih tawp chhuah a, a hmunah kan enpui zel chuan kan hlawhchham lovang a ti.

A sawi zelna ah Minister chuan Look East Policy chu kum 10 hnuah a lo lang dawna,  Agriculture lamah theih tawpa tan kan lak loh chuan kan hlawhchham dawn a ni tiin, Central  sawrkarin min beisei ang ngei a kan tih loh chuan kan mualpho thei dawn a, hlawhtling ngei tura hma kan lak angai a ni a ti. Pu Selthuama  MLA, NLUP Apex Board Chairman pawhin thu sawiin, tih tak takna nena thawkte chu an hlawh chham ngailo a ni a ti a, Missionary rilru pu a miretheite chhanchhuah hi kan tihtur a ni tiin, Line department te chu an mahni department hnathawh te a hmunah enpui thin turin a ngen bawk a ni.

Nimina NLUP chungchang meeting ah hian HPC Vice Chairman Pu Joseph Lalhimpuia pawh telin, Lunglei District a Line department hrang hrang hotute an tel kim hle a, an hmalak tawh dan leh an hmabak neih dante report ngaihthlak niin, harsatna leh buaina an neihte chinfel dan tur pawh sawiho a ni. Lunglei District-ah NLUP ah Industry  tih loh chuan 100% an sem tawh niin  meeting-ah hian tarlan a ni bawk.