Vawiin chawhma dar 11:00 khan Art & Culture Auditorium ah Oil Palm chingtute inhmuh khawmna hun buatsaih ani. He hunah hian Agri Minister Pu H.Liansailova chu Chief Guest niin Lunglei Bawrhsap Pu V.Sapchhunga, IAS chu khual zahawm a ni. Agriculture Department Director Dr. C.Lalzarliana kaihhruai ah hian report tawi DAO Pu Lalnunzira leh Ruchi Soya DGM Rakesh Singh Kushua te hnen atanga ngaihthlak a nih hnuah Agriculture leh Horticulture Department hnuaia NLUP tanpuina thawh hnih na sem nghal a ni.

Minister chuan kan ram a mihring tam ber eizawnna Agriculture hi sawrkar in a ngai pawimawh lo thei lo a ni a ti. Tunhma lam in zirtirna fumfe lo - hlawhtlin thutna lam sawi uara thawhrim tulna sawi tlem a awm thin chu tunah mi tam zawk thinlungah a len tawh avangin a pawi hle a ni a ti. Minister chuan ram leh hnam intodelh nan an pawimawh na a hre chiang em tih leh an chhungkua ei leh bar kawngah tih phuisui an tum tak tak em tih an in zawh nawn a ngaihthu a sawi a, kan ram rilru leh taksa a rethei tungding tur chuan kan thinlungah intodelhna leh thawhrim a tulna kan tuh thar a ngai a ni a ti.

Lunglei Bawrhsap pawhin sawrkar kut a engkim dah chu a fuh loh thu leh thawktha te chu sawrkar in puih a huam thu erawh thil dik a nih thu a sawi. DC chuan tun dinhmun ah chuan loneitute hmalakna chu ram kham khawp thar chhuak thei a ni lo tih chiang takin a hmuh theih a ni a ti. Loneitute hian tih dan thar ni lovin thinlung thar kan mamawh a ni a ti.