Vawiin chawhma khan Joint Electricity Regulatory Commission (JERC) for Manipur  & Mizoram leh Power &Electricity Department, Mizoram te tangkawp a buatsaih   One Day Workshop on Electricity Consumer Awarness  Art & Culture Auditorium, Lunglei ah neih ani.

JERC Chairperson Er. Lalchharliana Pachuau chuan Electrict hmang tu te hi Consumer pawimawh tak an ni a,  JERC in a tum ber chu Consumer ten Electric tha taka an hmuh theih nan, an hman dan mil leh phu tawka bill an chawi theih nan,a hun taka bill an hmuh theih nan, lungawi lohna an neihin chinfel sak an nih thuai theih nan, dan leh dun an bawhchhiat loh nan, Consumer te tihduhdahna laka venhim leh Consumer ten lungawi lohna an neih chinfel pui te ani. Eng chhitu mipui ten dikna leh chanvo an neih thusawiin eng tha zawk an hmuh theihna tura mawhphurna an neih ve te leh eng an hmuh dana lungawi lohna neite zualkona hmun tur te a sawi bawk.

JERC a Asst. Chief Engineer Er. H. Thanthianga chuan eng chhit man bithliah anih dan te, eng chhit man san thinna chhan te a sawi a. Sorkar in mipuiten eng chhit man an chawi tur thenkhat a tumsak zat chu a kum tela tihhniam tum ani ati. Dan dik taka eng mipui in an chhit loh chuan eng chhit man a san phah thei tih a sawi a, power renchem anih chuan man tlawm zawkin eng an chhi reng thei dawn tih a sawi bawk. 

 Er. Zoliana, SE, Lunglei Circle pawh in thu sawiin Lunglei Circle hnuai ah 33 KV. Sub Station 5 a awm a, kum 2018-2019 April - March chhungin Lunglei Circle ah Power 72.59 Million Units hmuh niin 58.68 MU Consumer te hnen ah hralhchhuah ani a, Lunglei Circle chhung ah Consumer 54,880 an awm thu a sawi.Sorkar in Power unit khat Rs 7.68 a lei a, Consumer te hnen ah Rs 4.96 in a hral in Rs 2.72 subsidy pek ani ati.

Er. Zodingliana, EE, Power Maintanance Division I, Lunglei chuan PMD I hian Sub Division 4 a enkawl a, 132KV Sub Station Bukpui atangin 132Kv S/C line 69 km hmangin khawiva 132kv ah power la lutin khawiva atangin 33Kv hmangin semdarh leh thin ani ati. Khawiva 132kv Sub Station ah 2x12.5MVA, 132/33KV transformer a awm a, hei hi District 3 te hian an tawm vek a, District 3 te hian power 18MW an hman thu a sawi. Kum 2018-19 chhunga power hmuh chu 32.198MU niin Consumer te hnena hralh chhuah chu 26.762MU anih thu a sawi bawk.