Social welfare Department, Sericulture etc changtu Minister of State Dr. K. Beichhua chuan a Department chan te hnathawh kalphung enfiahin vawiin khan kolasib District a tlawh.

Minister hian sethawn a SWD enkawl Observation Home tlawhin an hmalakna tlangpui a zirchiang a, Building hrang hrang thawmthat ngai ni awma langte a tlawh kual a,hmalak dan tur SWD hotute a sawipui bawk a, helai hmuna naupang enkawl mekte kawm bawkin Pathian hre reng chunga nunkawng zawh turin a fuih a ni. Hemi bakah hian Bilkhawthlir a Eklavya model Residential school (EMRS) sakna tur hmun, Sericulture Department hmalakna hnuaia ERI Seed Farm, projet veng leh saidana MUGA farm bakah Sericulture department building sak mek te a tlawh bawk a ni.

Dr K. Beichhua chuan kawng hrang hranga Ram in hma a sawn theihnan Sawrkar in hma a la chho zel a, ama Department chan ho zingah pawh EMRS chu lunglei leh serchhip ah Sikuk tan ani tawh a, Ngopa, Tipa, Lawngtlai, chawngte ah sikul building sak hna a kal mek a, Bilkhawthlir, Tlungvel, zawlnuam, siaha leh Aizawl tlangnuam ah te hna tan theih mai turin an  inpuahchah mek thu sawiin Ministry of Tribal Affairs ruahmanna hnuaiah naupang tam takin a thlawn in CBSE course an zir thei dawn ani a ti. Minister chuan hamrchhak bial a bik takin Mizoram chu silk tharchhuah na kawnga theihna sang tak a nei tih Central Silk Board chuan an hriatpui thu sawiin, he theihna (potential) hmang tangkai hian China lam atanga silk lakluh thin chu tihtawp ani anga, hmarchhak bial chu silk tharchhuah na kawnga India rinrawl ni tura puahchah an tum thu a sawi bawk a, a bial Siaha a tan Central Silk Board chuan 12 crore Project an siamsak thu tarlangin Mizoram pum huap a tan Mega-Project an buaipui tan dawn thu sawi bawkin, Mizoram chu silk producing State a siam an tum a ni a ti.

Hemi bakah hian Excise & Narcotics Department hmalakna in Ruihhlo Do beipui an thlak tur thu tarlangin Mizoram dinhmun tawn mek chuan a rilru a ti nat thu a sawi a ruihhlo avangin thalai tamtak in nunna an chan a, hmeithai leh fahrah an pun bakah HIV AIDS kai an tama, ruihhlo chu tih takzeta do a hun tawh ani a ti.  "Sawrkar in kawng hrang hrangin hma ala  anga, mipui ten theihtawp chhuah a min tawiawm turin ka sawm che u a ni" tiin Ram leh Hnam humhalh nan mitin in mawhphurhna kan nei a, Ram nuam zawk siam turin kan vaia kan thawhho angai ani a ti.

Minister hi Mamit bialtu MLA Pu H. Lalzirliana, MADC MDC pahnih Pu FC Rehmo leh Pu Biakcheuva, Social Welfare Department Director Pi Vanlalpianpuii, Sericulture Department Dy. Director Pu R. Vanlalvuana leh Official hrang hrang ten an tawiawm a ni.