Naktuk, May ni 23, 2019 (Ningani) zing dar 8 atanga 1-Mizoram Parliamentary Constituency atana Lok Sabha MP thlannaa Lawngtlai District chhunga vote tlate chhiar tura inbuatsaihna chu peih fel a ni tawh.

Lawngtlai District-a assembly bial pathum, Tuichawng, Lawngtlai West leh Lawngtlai East-a vote tlate chu a hrang theuhvin Govt Lawngtlai College-a Counting Hall pathumah chhiar a ni dawn a. Vawiin khan Counting Observer Pu Pankaj Jain, IAS bakah, Lawngtlai DC Pi Shashanka Ala, IAS leh Lawngtlai SP Pu Amit Goel, IPS leh Election Official-te'n Counting Hall pathum te hi an endik a, siam rem ngai tlem la awmte siam rem nghal niin, CCTV, internet connection leh counting material-te en fel a nih bakah, Control Room cum Media Centre pawh hman mai theihin peih fel tawh a ni.

Tuichawng leh Lawngtlai West Counting Hall-ahtevote chhiarna tur dawhkan 10 ve ve hun niin, round 7-a chhiar zawh tura ruahman a ni a; Lawngtlai East Counting Hall-ah dawhkan 6 hun ni thungin, round 6-a chhiar zawh tura ruahman a ni. Tun tum vote chhiarnaah hian assembly bial pakhat a?angin polling station panga zelah VVPAT-a vote tla chhinchhiahte chhiar tel tur a ni.

April ni 11-a Lok Sabha inthlanna neihah khan Lawngtlai District chhunga assembly constituency pathuma polling station 165-a voter 82711 atangin voter mipa 27717 leh hmeichhia 25815, an vaiin voter 53532-in vote thlakin, vote hi 65% a tla a. Polling station 62 awmna 36-Tuichawng (ST) Assembly Constituency-ah voter 31470 awmin, vote 23466 (75%) a tla a. Polling station 68 awmna 37-Lawngtlai West (ST) Assembly Constituency-ah voter 27058 awmin, vote 17627 (65%) a tla a. Polling station 35 awmna 38-Lawngtlai East (ST) Assembly Constituency-ah voter 24183 awmin, vote 12439 (51%) a tla bawk.