International Day for Biological Diversity Day 2019 chu Vawiin khan Chhimveng YMA Hall-ah hman a ni a. Dr.Ch.M Rao, IFS Principal Chief Conservator of Forest, HOD Environtment, Forest and Climate Change Department, Government Of Mizoram chuan khuallian niin a hmanpui a. Pu Lalmuankima, Honorary Wildlife Warden, Mamit District chu khualzahawm a ni bawk.

He hun hmanpuitu Dr Ch.M.Rao chuan International Day for Biological Diversity Mamit District-a a vawikhat nana hman a ni chu lawmawm a tih thu a sawi a, kan chenna khawvel chu midangte chen ve zelna tlaka siam tura hmalakpuiah kalkhawmte sawmin, Mamit District mipuite,zirlai naupang, Tlawmngai pawl hrang hrangte chu kan chenna khawvel chhe mek tur venhim kawngah Forest Department te nen thawktlang turin a sawm bawk. Kan chenna khawvela, mihring, thlai hrang hrang leh thilnung dangte chu khairual taka in mamawh tawn vek tura siam kan ni a, thil pakhat kan tichereu a, kan tih riral bik chuan thangtharte te tana chenna tlak ram kan siam thei dawnlo a ni tiin, Mamit District ah Anchiri chu humhalh a tul thu a sawi, kan neihsa hi kan hralh emaw kan tihral vek chuan khawi a tang nge kan hmuh leh ang tih chu kan ngaihtuah a tul hle a, Mamit District chhung khaw hrang hranga Biodiversity Management Committee( BMC) din niin  kan chenna khawvel tihchhiat anih zel loh nana hmala tura din an nih thu a sawi bawk.

Pu Lalmuankima, Khualzahawm Honorary Wildlife Warden Mamit District pawhin thusawiin Biodiversity tichhelo zawnga khawsatu kan nih chu a pawimawh hle a, humhalh zawnga hma kan lak loh chuan midangte leh thangtharte tana harsatna nasa tak siamtu kan ni dawn a ni a ti. Hmasawnna kawng kan zawhna tam tak te avangin kan chenna khawvel a lo buain a lo ro ta hle a, heng kan hma harsatna liantak kan tawh tur veng tur hian kan zavaia kan tan lak a tul thu a sawi bawk.

Pu Liandawla Member Secretary, Mizoram State Biodiversity Board pawhin thusawiin kan chenna khawvel chuan lum lam a pan zel a, chhuanmang zawnga khawsa tu nilovin, kan tu leh fate tana chenna tlak ram siam turin nasa taka hma kan lak a ngaih tawh thu a sawi a, International Day for Biological Diversity Mamit khawpuia hman a nih chhan chu mihringte leh leia cheng zawng zawngte kan in mamawh tawnna kan hriata, midangte hrilhhriat kawngah pawh hma kan lak theihnan a nih thu a tarlang.

Vawiin Programme- ah hian Dr Lalneihpuia, Chhakchhuak, Technical Assistant, Mizoram Biodiversity Board leh Pu HT Lalremsanga, Assistant Professor, Department of Zoology, Mizoram University te chuan Our Biodiversity, Our Food, Our Health tih leh Magnificent Wilds of Mizoram tih thupuia hmangin kalkhawmte a lem nen zirtirna an pe a, Pu K. Lalmuansanga, President  Associate For Environtment Protection chuan thusawina neiin Pu Lalhmunsiama, Nungchate thian chuan special Items a nei bawk a. Pu H. Lianmawia, Conservator of Forest (WL) & Director, Dampa Tiger Reserve chuan lawmthu sawina a nei bawk a ni.

International Day for Biological Diversity 2019 thupuiah hian 'Our Biodiversity, Our Food, Our Health'  tih chu hman niin Mamit khawpui chhunga Sawrkar Department aiawh, Tlawmngai pawl hrang hrang, Zirlai naupangte leh thutharthehdarhtute an tel a ni.

He programme denchhena LENS Mamit te'n an buatsaih thlalak hrang hrang kalkhawm mipuite thlir theih tura chhawpchhuah a ni bawk.