Vawiin khan Chief Electoral Officer, Mizoram Pu Ashish Kundra chuan Aizawl-a vote chhiarna hmun tur zinga pakhat Assembly Annexe-ah naktuk a vote chhiar tura inpuahchahna te a hmunah a enfiah.

Chief Electoral Officer Pu Ashish Kundra chuan vote chhiar tura inpuahchahna te chu uluk taka kalpui tur leh tihsual engmah a awm loh nan fimkhur  turin Returning Officer (RO) leh Counting Assistant Returning Officer (Counting ARO) te chu a chah a ni. CEO hi Pu Vanlalngaihsaka, Returning Officer, Pu H.Lianzela, Jt.CEO leh Pu CC.Lalchhuangkima, Deputy CEO ten an tawiawm a ni.

Nimin khan Pu Ashish Kundra, CEO chuan Mizoram puma vote chhiarna atana inpuahchahna te chu video conferencing hmangin ARO leh DEO te nen thlirlawkna a neihpui a, Aizawl bika Counting Centre 3-a Counting Hall zawng zawng te a tlawh chhuak vek bawk a ni. CEO hriattirna ang hian vawiin chawhma khan Counting Centre zawng zawng te hi vote chhiar turin an inpeihfel tawh a ni.

Naktuk 23.5.2019 zing dar 8 atang hian General Elections to Lok Sabha-2019, 1-Mizoram Parliamentary Constituency leh Aizawl West-I Bye Election atana vote tla te chhiar a ni dawn a.  Mizoram puma Counting Centre 10 chhunga Counting Hall 40 ah te  Counting Official 1321 in vote an chhiar ang.

Vote chhiarna atan hian venhimna uluk taka kalpui a ni a, Mizoram Police leh Central Armed Police Forces (CAPF) ten chhawng thumin vote chhiarna hmun te hi an veng dawn a ni. Vote chhiar te hi rang taka hriat a nih theihna turin Election Commission of India chuan Mobile App “New Suvidha” a siam a, hei hi ram puma ARO zawng zawng ten an hman tura ruahman niin, heta tang hian ECI website leh Voter  Help Line (Mobile App) ah te inthlan result a en theih dawn a ni.