Election Commission-in Mizoram inthlan hun tur a puan atanga ni 3-naah political parties zawng zawngte Model Code of Conduct chungchangah training pek tur a ni a tih angin vawiin khan Lunglei D.C. Conference Hall-ah Political Parties-te tan ‘One Day Workshop’ neihpui a ni.
He ‘One Day Workshop for Political Parties’ hawngtu Lunglei D.C. Pu V.Sapchhunga chuan Election Commission duhdan angin inthlan felfai neih theih nan political parties-te an pawimawh hle dawn a ni, a ti a. Kum dangah tih ngai loh thil thar hmachhawn tur a tam dawn avangin political parties-ten lungrual taka advertisement leh election kaihhnawih thil dang rate siam fel turin a chah a. Political Parties ten Model Code of Conduct te, Expenditure Monitoring chungchang leh election kaihhnawih thil pawimawh dangte an hriatchian phawt chuan inthlanna felfai neih kawngah District dangte aiin Lunglei a hnufual lovang, a ti.
Political Parties aiawha kalkhawmte chu Expenditure Monitoring, Legal Lrovision, Model Code of Conduct leh Role of Political Parties chungchangah Dr.Andrew H.Vanlaldika, Addl. DC; Pu Donny Lalruatsanga, SDO(C) Tlabung leh Pu K.Vanlalthiana, SDO(C) Lunglei ten training an pe a ni.
