Vawiin khan Vanapa Hall-ah State Information Commission leh Information & Public Relations Department buatsaih, RTI Hapta chu Chief Information Commissioner Pu Lal Dingliana IFS (Rtd.) in a hawng. He hapta hi Sorkar laipuiin mipuiten RTI an lo hmelhriat belh a, an hman tangkai zual theih nan leh, sorkar inrelbawl dan a lo fel zual theih nan kum tin hman ni se, ti a a lo rel tawh ang a kalpui a ni.

RTI Hapta hi October ni 5 atanga ni 12 thleng huap tur a ni a. Amaherawhchu Sorkar pisa khar ni, Inrinni leh Chawlhni in a nan vangin Mizoramah chuan ni 7 atanga hman tan a ni ta a ni. RTI Hapta hawnna inkhawmah hian Chief Information Commissioner chuan Mizorama RTI dan kalpui a nih dan te sawiin, RTI hi mipuite tana siam a nih angin tangkai lehzual a hman nachang hre turin mipuite a chah. He hunah hian mipuiten RTI chungchanga zawhfiah duh an neih te Panel Member – Pu Lal Dingliana, IFS (Rtd.), Chief Information Commissioner, Pu L. Hrangnawna, IPS (Rtd.), Information Commissioner, Pu Jim K. Chozah, Director, I&PR leh Pu Vanlalvuana, Dy. Director, ATI; ten an chhang a ni.

He inkhawmah hian DAA, SPIO, SAPIO-te, Local Council hruaitute leh tlawmngai pawl hrang hrang a Office Bearer-te, media lamte leh College zirlaite an tel a ni.