North Easrtern Council (NEC) bultumin nimin 21.7.2015 khan Bamboo Development Agency (BDA), Industries Department leh Cane & Bamboo Technology Centre (CBTC), Guwahati te tangkawp chuan Lunglei Bamboo Handicraft Cluster hnuaia member-te tan mau hman tangkai dan leh eizawnna tlaka thiamhnang dehchhuah dan zirtirna ' One Day Workshop on Bamboo Utilisation & Applications' chu DIC Conference Hall-ah an buatsaih.
He Workshop-ah hian mau hmanga Wood & Bamboo-based Industry din tum leh din tawhte tan furniture siam dan leh hmanraw mamawh turte kawhhmuh a ni a. Programme hi Session-2 ah then niin, Session hmasa zawk chu Pi R. Lalrodingi, General Manager, District Industries Centre (DIC), Lunglei-in a kaihruai a; Pu C. Lalrinmawia, CDO, Bamboo Development Agency chuan Technical Report a pe a; Cane & bamboo Technology Centre, Guwahati-a Dy. Manager (Trg) Pu Priyo Kumar Singh chuan member-te hriat tur thil pawimawh a hrilhfiah bawk. Session hnihna chu Pu R.Vanlalsanga, Industrial Promotion Officer, DIC, Lunglei-in a kaihruai a; Cane & Bamboo Technology Centre atanga mithiam rual rawn kal ten practical class an neihpui a ni.
Workshop chhimtu entrepreneurs kalkhawmte chuan Workshop an hlawkpui hle thu an sawi a, eizawnna ngelnghet zawk dapna kawng that an hriatbelh bakah chona thar siamsak an nih chu lawmawm an ti bawk.
Lunglei Bamboo Handicraft Cluster hi BDA, Industries Deaprtment hnuaia awm a ni a, he Cluster pual hian a hma pawhin Bamboo handicraft Training buatsaih sak an ni tawh thin a. Mizoram sorkar programme pawimawh tak UN Joint Initiative Project hnuaia mau lam khawihtu UNIDO ten he cluster hi tlawhin an rawn zirchiang tawh a ni.
