Vawiin khan Kolasib DC Pu Jitender Yadav hovin a office ah Kolasib District huamchhunga Saansad Adarsh Gram Yojana (SAGY) Model Village atan thlan khaw 3 – Thingdawl, Meidum leh Saiphai a he ruahmanna kalpuina tura atan Village Development Plan (VDP) siam chungchang chu Line Department aiawhte leh chanvo neite nen sawiho a ni.

Pu Jitender Yadav chuan Model Village atan hian a hranpa in sum ruahman a awm dawn lo tih sawiin Department chanvo neite chu ruahmanna an siam reng reng huamzau leh chipchhiar taka siam turin  hrilh a. SAGY hi mipui tana ruhrel tangkai ang chi siam leh kawng hrang hranga thingtlang mipuite chawikanna anih dawn mai piah lamah hriselna lam, chin tha leh an rilru sukthlek thlenga siam thatna leh kawng dik khawhmuh a huam tel tih a sawi bawk.

Meeting ah hian Village Development Plan  siam chungchanga training chu SIRD ah July ni 30 ah neih nise tih te, Village Development Plan siam atan data leh lehkha pawimawh chu July ni 31 hmaa theuhluh nise tih te leh VDP chu August ni 15 hnu lama siam te rel a ni a. Heng khaw 3 a cheng mipuiten August ni 14 hma ngeia Aaadhar Card an neih vek theih nan SDO (Sadar), BDO Thingdawl leh BDO Bilkhawthlir te chu hma la turin DC hian hrilh a ni.

Saansad Adarsh Gram Yojana (SAGY) Model Village tia hriat hi thingtlang khua te’n hmasawnna kawng chak zawk leh fuankim zawka an zawh theih nan Sawrkar Laipuiin a duan a ni a, he Scheme kengkawhtu chu Sawrkar Laipui, Ministry of Rural Development a ni. MP leh State tinah MLA te chu an Bial huamchhung ah Model Village-a siam tur khua thlang theuh tura tih an ni a. Kolasib District chhunga pawh Model Village tur hi thlan fel an ni tawh a. Turial MLA Bial ah Thingdawl, Kolasib MLA Bial ah Meidum leh Serlui MLA Bial ah Saiphai te chu Model Village atan thlan an ni.