Vawiin chawhma dar 10:00 khan Lunglei Circuit House Conference Hall-ah District Child Protection Unit (DCPU) leh Superintendent of Police, Lunglei tangkawp buatsaihin naupang bo leh vakvaite tanpui beihpui thlak – Operation Muskaan III chungchang zirho a ni. Pi Lalzarmawii, IAS, Lunglei Deputy Commissioner chuan khuallian niin a hmanpui.  Training-ah hian Lunglei District chhunga police officer zawng zawngte leh DCPU staff-te bakah Child Welfare Committee (CWC) member-te an tel.

He zirhona hun hi Lunglei DC Pi Lalzarmawii chuan hawngin, naupangte humhalh chu sawrkarin a ngai pawimawh takzet a, department hrang hrang tangkawp ten hemi kawngah chak takin hma an la chho zel dawn a ni, a ti. Mizoram chu ramchhung state dangte angin naupang hnathawk (child labour) te awm ve lo mahse naupang kum tling lo State pawna hnathawk tura hruai chhuah an awm thin chu pawi a tih thu a sawi a. Naupangte chhanchhuah kawnga Police leh  DCPU-te hnathawh leh thahnem ngaihna chu fakawm a tih thu sawiin khawngaihna leh lainatna rilru pu tlat chunga hna thawk thin turin a chah bawk.

Vawiin training hawnna inkhawm hi Pi Lalrinkimi Hmar, Lunglei District Child Protection Officer-in kaihruaiin Operation Muskaan I leh II kum 2015 leh 2016-a Lunglei District chhunga kalpui a lo nih tawh thu sawiin, hemi kawnga an hmalak dan tlangpui a sawifiah a.  Naupang humhalhna kawnga Dan chi hrang hrang – POCSO Act, Juvenile Justice Act, Protection of Child Right Act, CrPC leh IPC-a Dan pawimawh dangte zirho a nih tawh bakah home hrang hrangte tlawhin naupangte dinhmun an lo zirchiang thin tawh bawk a ni.

Vawiin training-ah hian Pi Vanlasiami Tlau, Lecturer GHSS-in ‘Issues Relating to Child in Conflict with Law’ tih thupui hmangin zirtirna pe in, Pi Lalramhluni, Supervisor, BHSS-in ‘Values of a Child’ chungchang kalkhawmte a zirtir a. District Child Protection Unit hnuaia Protection leh Probation Officer-ten Operation Muskaan III kalpui dan tur an sawifiah bawk.  

Operation Muskaan-hi Sawrkar Laipui Ministry of Home Affairs (MHA) bultuma neih niin a tum ber chu naupang bo, enkawltu neilo chhanchhuah leh chhawmdawl bakah naupangte dinhmun zirchian a ni.