Vawiin khan RNTCP Conference Hall, Lunglei-ah Lunglei Town Area chhunga Para-Medical Worker ten ‘Pentavalent Vaccine Programme’ an hman tan tur chu Lunglei DC Pu Ashish Madhaorao More’n a hawng.

Pentavalent Vaccine Programme hawnna inkhawm Dr.Ch.Laldinpuia, SMO kaihhruaiah Khuallian Pu Ashish More chuan ramchhung state hrang hranga neih tawh, naupang thla 6 atanga kum 1 te hnena natna chi 5 (diphtheria, pertussis, tetanus, hepatitis B leh Haemophilus influenzae type B) venna tur vaccine tum khat inchiuna a pek theih ‘pentavalent vaccine’ chu Mizoramah pawh hman tan a ni tur chu a lawmawm hle a; Lunglei District tan pawh a vanneihthlak takzet a ni, a ti. Nau piangte tan hriselna hi a pawimawh hle a, naupang enkawl leh puitling thlengin hrisel taka an seilenna turah hian khawtlangin mawh kan phur vek a ni, a ti bawk. Nausen/naupang ten he pentavalent vaccine pawimawh an lak vek theihna turin nu leh pa ten a hun takah hruai theuh se, para-medical worker te pawhin theihtawp chhuah bawk se; Lunglei District hi he programme hlawhtlinna ber ni nghe nghe thei se tiin Lunglei Bawrhsap chuan District mipui zawng zawngte tan la theuh turin a sawm.

Dr.Lalparliani, SMO, Lunglei chuan pentavalent vaccine pek dan leh naupang tan hriselna a nih dan chungchang a sawifiah a. Lunglei District-ah a hmasa ber atan HK Lalruathlui d/o Lalthuthlengmawii, Chanmari-II hnenah epntavalent vaccine hi vawiin khan pek a ni.