Vawiin chawhnu dar 1:00 khan Lunglei Circuit House Conference Hall ah Pu Zodintluanga Sports Minister leh Pu S. Laldingliana, Parliamentary Secretary ten tualchhung chanchinbu mi te kawmna an nei. Kum 4 leh a chanve chhungin Lunglei District in hmasawnna hmuh tur tam tak a nei a. Lunglei District a la awm ngailo Multi Purpose Indoor Hall, Sazaikawn-ah cheng vaibelchhe 6 a sak tum a ni a, mirethei in leh lo neilo chhungkua 500 tan in sak sak an ni a, UD&PA Deptt. hnuaiah retaining wall leh step siam nan vaibelchhe 8 vel sen a ni a. Lunglei Electric veng ah SAI extension centre leh Thuamluaia Mual ah phullem phah a ni tawh bawk a. Serkawn ah Stadium puitling sak nan ram neih a ni tawh a, a sak nan hian cheng vaibelchhe 20 central ah DPR thehluh a ni a. Shopping Complex sak nan cheng vaibelchhe 22 pawh approved a ni tawh bawk. Lunglei District tan a recreation centre Theiriat a sak tur pawh kalpui mek a ni, Pu Zodintluanga’n chuan a ti. HPC Fund cheng vaibelchhia 7 sawrkar in Lunglei District hmasawnna atan dah a ni a ti bawk. Catch Them Young leh 2016 vision pawh chak taka kalpui mek a ni a, thingtlangmi talent nei thate zawnchhuah mek an ni a ti.

Pu S. Laldingliana pawh in sawrkar hmalakna thenkhat sawiin, hriselna lamah Mizoram sawrkar-in hma chak takin ala mek a, Aizawl Referal Hospital khum 500 awm theihna tur leh Cancer Hospital khum 100 awm theihna tur DPR peihfel a ni tawh a. Mizo nula leh tlangval ten mahni ram ngei a an zirve theih nan Medical Collage DPR peihfel a ni tawh a ti bawk. He inkhawm na ah hian Tualchhung chanchinbu mi an tel tha hle.