Mizoram State Olympic Association chuan vawiin khan Chief Minister Office cabinet room-ah Executive Meeting vawi 7-na an President Pu Lal Thanhawla, Chief Minister hoin meeting an nei.

Meeting-ah hian thurel tur agenda engemawzah an chhawpchhuah zingah sorkar-in programme pawimawh tak alo hawn tawh, ‘Olympic Vision 2016’ tia vauh, kum 2016 a Brazil khawpui Rio de Janeiro a olympic neih tura Mizo thalaite, sports discipline 9 thlan chhuah te zinga a engemaw bera an tel ve ngei theihna tura sorkar-in hma a lak tan mek chu olympic association anih anga a mawhphurtu leh hma latu tur ni vea inngaihnaah engtinnge hma an lak ve ang tih chu uluk taka sawihoin, College hrang hrangah kala lecture te pek nise tih an rel a. Olympic Day Run kumtin June ni 23 a neih thin chu kuminah Pathianni (sunday) anih avangin june ni 22 inrinni ah hmang turin Assam Rifles lammual chu dil nise tih an rel bawk a. Aizawla lo buatsaih tawh Sports Medicine Seminar chu District hrang hrangah buatsaih ve nise tih an sawiho bawk a.

Association hi nikum 2012 atang khan mi in luahin office hrang angin an lokal tawh a. Hun lokal zel tur thlirin mahni puala building neih ve ngei chu thil tulah ngaiin hemi atan hian sorkarah Aizawl khawpui hmun laili Assam Rifles chhuahsan turah ram dil nise tihte an rel bawk a. Hengte bakah hian nakum 2014 February thla a National Games vawi 35-na Kerela state a neih turah Mizoram state aiawhte hruaitu tur Chef De Mission pakhat leh Dy Chef De Mission pahnih a hma thei ang bera ruat tura MSOA tih an nih angin Chef De Mission atan MSOA Secretary General nilai Pu Zoliana Royte chu meeting chuan a ruat a. Dy Chef De Mission turte chu Pu Zoliana Royte kutah an dah a ni.