: Nimin khan Young Mizo Association (YMA) Hmunpui Branch Platinum Jubilee leh YMA Day lawmna programme Branch YMA in Hmunpui Community Hall-a an buatsaih chu Mizoram Legislative Assembly Deputy Speaker leh Bialtu MLA ni bawk Pu John Rotluangliana’n a hmanpui. YMA Hmunpui Branch Platinum Jubilee lawmna programme hi June ni 10 khan neih tan niin hnatlang, inelna hrang hrang, Jubilee Lung phunna leh intihhlimna hun te hman a ni bakah June ni 14 khan Jubilee Puala Souvenir buatsaih ‘Lungremmawi’ tih chu tlangzarh bawk a ni.

Pu John Rotluangliana chuan hetiang hun lawmawm, Hmunpui Branch YMA in kum 75 lai alo tling ta chu  hun ropui a ni a tiin YMA member zawng zawng te duhsakna hlanin Jubilee chibai a buk a. YMA chu Mizoram pawl ropui ber anih thusawiin Kohhran leh Party ramri khamna awmlohna pawl YMA a Zofate kan leng vek hi a ropui a, YMA ang pawl huapzo kan nei hi kan vannei a ni, a ti bawk. YMA hnathawh leh hmalakna hrang hranga a bik takin tuihna humhalh kawnga an hnathawh chu a fakawm tih thusawiin mipui lam pawhin Sawrkarin in tui lakna atan min siamsak pipe te, tanky te duat taka leh mahni ta anga kan enkawl hi kan ti makmawh a ni a ti.

Kan ram kan, hnam kalzelna turah tlawmngai pawl hrang hrang an pawimawh a, bikin YMA hi thalai te tel tamna ber an a ni a tiin Deputy Speaker chuan heng thalai rual te hian ram tan enge ka tih ve dawn, enge ka tih theih tih hi ngaihtuah fo thin se tiin a duh thu a sawi.  NLUP chungchang sawiin Pu John Rotluangliana NLUP trade hrang hrang vawkvulh ani emaw, arvulh a ni emaw tih tak tak thawh a ngai a, thalai thiam zawk leh rem hre zawk ten an nu leh pate an puia, an tanrual chuan tun aia nasa zawk an hlawhtlin ngei a rin thu a sawi. Thalai te hian eizawnna kan ngaituah tak tak a tul a tiin hnathawh kan hreh chuan hnam ang kan dinchhuah loh a hlauhthawm awm a ni a ti. YMA member te chu tlawmngaihna chawi nung zel turah chahin an zirna lam a ni emaw an hnathawhna kawnga ani emaw rinawmna leh taimakna nen hmachawn zel turin a fuih bawk a ni.

YMA Day programme hi Pu Sangromawia President YMA Hmunpui Branch chuan kaihruaiin Upa H. Valbuanga Life Member chuan hunserh a hmang. He hun hi Pu R. Lalrindika Asst Secy CYMA pawhin hmanpuiin thu a sawi a. Pu Lalsawmliana Scientific Officer, Science & Technology Department chuan ruahtui khawl dan chungchang sawiin hun a hmang bawk.  He hunah mi harsate puala thawhlawm an khawm tling khawm Rs. 4515 chu an khaw chhunga mi harsa te tanpui nan an hman tur thu Branch YMA hruaitute hian an sawi a ni.