Keifang leh Saitual a YMA Branch hrang hrang ten Inrinni a YMA Day vawi 78-na lawmna programme  an Branch huamchhung theuhva an buatsaih chu Home Minister leh bialtu MLA ni bawk Pu R. Lalzirliana chuan tlawhkualin nilengin heng programme te hi a hmanpui a ni. Zing lamah khan Home Minister leh Saitual Joint YMA hruaitute chuan Saihmartlanga YMA ram humhalh ah thing tiak engemaw zat an phun. Keifang a YMA Branch pathum te chuan YMA Day lawmna hi Joint YMA Keifang kaihruainain Community Hall ah an hmang a, Saitual a YMA Branch pathum – Saitual Venglai, Saitual Bazar leh Chawnpui te chuan a hran theuhin YMA Day lawmna programme an buatsaih a ni.

Heng hmun ah te hian thusawiin Home Minister Pu R. Lalzirliana chuan YMA chu pachhiate tan pa, tanpui ngaite tanpuitu, nu nau leh hmeithai te thlamuantu leh mite tan malsawmma a ni a ti a. Ruihhlo dona kawngah te, khawtlang nun siamthat kawngah te leh ram leh hnam humhalh kawnga an hmalakna te, YMA park siam a, thing leh mau humhalh nachang an hria te leh Zoram siamthatna kawnga YMA tha thawh leh hnathawhte hi a ropui a, kan chhuang takzet che u an ni, a ti.  Kum 15 chhung a bial mipui leh YMA ten, a tlin lohna leh fel lohna te hria a kawng hrang hranga tha taka an tawiawmna leh an puihnaah te lawmthu sawiin thawhhona tha tak kan neih avangin Saitual leh a chhehvelah hian kum nga chhung hian nasa takin hmasawnna hrang hrang, a sum zawng a chut chuan vaibelchhe tam tak a rawn luang lut a, Saitual leh a chhehvel hmel danglam dawrha kan cheihthat theihna chhan chu thawhhona tha tak kan neih vang leh Pathian min awmpuina avang liau liau a ni a ti. 

Home Minister chuan Sports lamah thalai te an tlan chaka, an tan thil tha tak nia hriat anih vangin Saitual-a Mini Sports Complex sakna dan tur ngaihtuah mek a ni, tiin he Project hi NLCPR a Priority a dah a ni a ti a. Jail tana Sihfa miten phal taka ram an pe chu a zawhawm a, hmasawnna atana an inpekna chu lawmawm tiin kuminah a bultan beisei a nih thu a sawi. Saitual a Tribal Hostel sak mek te, Greater Saitual Water Supply Scheme hna thawh mek te zawh hunah leh Tam Dil cheibawlna tur te chuan nasa takin zirna, tui harsatnaa tih zaihawm leh khualzin hipna kawngah te hma thar a siam ngei a beisei thu a sawi. MW 210 pe chhuak thei, cheng vaibelchhe 1756 man Tuivai Hydel Project chu tunhnai khan pawmpui fel anih tawh thusawiin Home Minister chuan he kawlphetha project tan hian sum Central Sawrkar-in ngaihtuah tur ni mahse a project hi state project anih dawn avangin a puitlin hnu kum 35 chhung chuan Mizoram in unit khat cheng 3.55 chauhin a lei thei anga , hei hi man sang zawkin ram dang leh state dangte hnenah kan hralh thei dawn a, chu chuan intodelhna nasa takin min pe thei dawn a ni a ti.

YMA Day lawmna programme a thalai kalkhawmte chu hmasawnna hrang hrang avangtein an hmachhawp a eng dawn a, chumi hun chu nuam taka an thlen theih nan ei leh in a insum a, zuk leh hmuam a fihhlim a, nun uluk taka vawng turin a chah a.  Pipu te min rochhun tlawmngaihna leh Mizo nun zemawi te chawi nunga a taka lan tir zel turin a fuih a. Vanglai hun chu mihring nunah hun hlimawm ber a ni a, mahse vanglai hun chu Pathian hre reng chunga a duh dan anga chen a tul thu Home Minister hian a sawi bawk.

Keifang Joint YMA te chuan an Member mi panga sports lama state level leh national level a medal late hnenah chawimawina thuziak an hlan a, hengte hi Pu R. Lalzirliana chuan a hlan a ni. Keifang leh Saitual a YMA Branch pathum ve ve te Rs. 5000 theuh a hlan bawk a ni.  

Attachment

  • Loading attachment...