Lunglei-a kumin Republic Day 2016 lawmna atan inbuatsaihna kal zel chungchang thlirhona neiin vawiin khan Lunglei D.C. Pu Ashish Madhaorao More, IAS hovin DC’s Conference Hall-ah Heads of Offices/Departments ten meeting an nei.

Kumdang ang bawkin Republic Day 2016 lawmna pui ber chu Thuamluaia Mual-ah neih a ni ang a, sorkar hnathawkte leh mipui zawng zawngin ngai pawimawha kal theuh turin DC Pu Ashish More chuan a chah a. Kumin Republic Day-ah hian school contingents 20 chuang bakah scouts & guides, NCC, MAP leh sipai lam pawhin contingents rawn nei tura beisei an ni a. Tunkar chhungin parade rehearsal an neih chhoh zel chu Inrinni (23.1.2016) khian final rehearsal neihpui an ni ang.

Kumin Republic Day-a ‘President’s Award for Scouts & Guides’ dawng tur zingah Lunglei atangin school naupang 5 thlan an ni a, chungte chu :

1).Judith C.Ramdinmawii, Sacred heart School,

2).Jack Vanlalhriata, Sacred Heart School,

3).Vanlalhruaia Pachuau, Sacred Heart School,

4).Mika Lalmuanawma, Chawngfinga Memorial School, Zohnuaia leh

5).P.C.Lalbiaknunga, Chawngfinga Memorial School te an ni a. Award hi India ram President hnen atanga dawng tur an ni a, amaherawhchu rokhawlhna avangin New Delhi-ah an kal thei dawn lova; Republic Day lawmna Thuamluaia Mual-a neihah an lawmmante hi hlan nghal theih beisei a ni a. Hei bakah hian sikul zirlaite tana Republic Day puala ‘Essay Competition’ buatsaiha lawmman te pawh sem nghal a ni ang.

Kumin Republic Day lawmnaah hian Lunglei D.C. Pu Ashish Madhaorao More, IAS chu Khuallian niin hnampuanzar a pawt pharh ang a. A hnuah sawm bikte tan DC’s Lawn-ah chhun dar 1:00-ah ‘VIP’s At Home’ buatsaih a ni bawk ang.

Attachment

  • Loading attachment...