Vawiin chawhma dar 11:00 khan Lunglei Town Road Protection Squad chu Lunglei SDO(S) Pu H. Lalrinpuia, MCS hovin DC Conference Hall-ah an thukhawm. He meeting-ah hian Lunglei District-a a kaihhnawih tur Department hrang hrang official-te leh YMA hotute an tel.

Meeting-ah hian Lunglei khawpui chhung kawng humhalh chungchang leh mipui te an lo him zawk theihna tura hmalak dan tur sawiho a ni a.  Road Protection Squad member te hian September 22nd 2017 khan ‘Spot Verification’ neiin Lunglei khawpui chhung hmun hrang hrang tlawh kualin kawngpui dinhmun an enfiah a. He an inspection-a vantlang kawng nek chep, tuiluankawr chhia, kawngpui dunga in sakna bungrua dah, parking phal lohna a motor hun, kawngpuia tui/thli luantir an hmuh te meeting-ah hian sawiho a ni.

Meeting kaihruaitu Pu H. Lalrinpuia chuan Lunglei khawpui thang zelah kawng humhalh tura tan lak a hun takzet a ni tiin mipuiten kawng humhalh a tulzia an hriat theih nan ngawrh taka awareness campaign kalpui chhoh ni se, a ti a. Lunglei khawpui kawng a len loh avang leh bypass road te kan neih loh avangin hun lo kal zel turah kan kawngpui dung chep lutukin a la awm mai dawn a ni tiin Pu H. Lalrinpuia chuan Road Protection Squad thiltumte ti hlawhtling turin member ten nasa taka tan kan lak a tul a ni, a ti a.

Hemi hunah hian Lunglei SP Pu Lalthafamkima Jongte, MPS pawhin thu sawiin khawpui kawng humhalh chak taka kalpui tur chuan sawrkar Department hrang hrang ten thawhhona tha tak an neih a tul bakah tlawmngai pawl leh khawtlang hruaitute te nen tan lak ho a tul a ni, a ti a.  Mipuiten vantlang hmun an zah a tul bakah Sawrkarin Dan mumal tak a siam te kan zawm theuh a tul a ni tiin Lunglei SP chuan kawng humhalh hna hi Dan behchhan chunga khawng taka kan kalpui a ngai a ni, a ti bawk.

Lunglei khawpui kawng humhalh tur leh mipuite an lo him zawk theihna turin Lunglei District-ah nasa taka hmalak chhoh mek a ni a. Lunglei District Road Safety Committee September ni 11, 2017-a an thutkhawm tuma rel angin Lunglei khawpui chhunga autorickshaw driver te tan training neih mek a ni a. Hemi bakah hian veng tina lirthei awm zat survey leh motor document, driving license uluk taka enfiah turin ruahmanna siam chhoh mek a ni bawk. 

Khawpui chhunga kawngpui chhia, tuiluankawr chhia leh thenfai ngaite leh kawngpui nek chep a hmuna enfiah ‘Spot Verification’ hi thla tin neih ni se tih Committee chuan a rel bawk.