Vawiin chawhma khan DC Conference Hall Lunglei ah Planning & Programme Implementation Department, Government of Mizoram bultumin ‘Sensitization Workshop on Sustainable Development Goals for District Line Departments’ neih a ni. Pu R. Vanrengpuia, Lunglei Additional DC chuan he hun hi a hmanpui.

Pu R. Vanrengpuia chuan Sustainable Development Goals chu hmasawnna ngelnghet leh rualkhai kan neih theihna tura khawvel pum huap hmathlir pawimawh tak a nih thu sawiin hmasawnna kawng kan zawh meka min kaihruaitu atan a tul hle a, hmasawna tluantling leh tlo nei tura kawng pawimawh tak a ni, a ti. Hmasawnna tlo leh daih rei kan neih theihna turin Department-te pawhin kan hnathawhte leh kan hmalaknate kan inhriat tawn saka tan kan lak tlan a tul a ni tiin Workshop chu kalkhawmten tangkai taka an hman theihnan duhsakna a hlan a ni.

He hun kaihruaitu Pu Lalchhuanawma Hrahsel, Chief Consultant, SDG Mizoram chuan Sustainable Development Goals tobul sawifiahin United Nations General Assembly-in khawvel ram hrang hrangte'n hmasawnna ngelnghet an neih theih nana kum 2015 ah a din niin kum 2030 thlenga kalpui tura ruahman a nih thu a sawi a. Khawvel pumah hma lak niin, tum pawimawh tak tak 17 a nei a, chungte chuan target nei leh vekin, avaiin target 169 a awm thu a sawi. SDG hi sawrkarin amah maia a tih hlawhtlin theih a ni lova, State level atanga thingtlang ber thlenga tanrualna atanga hlawhtling thei chauh tur anih thu sawiin, vawiin ah pawh hian district chhunga an thawhpui tur sawrkar department hrang hrangte hnenah an hnathawh dan tur leh kalphung turte inhrilhhriatna hun buatsaih a nih thu a sawi a ni.

He hunah hian Pu C. Lalnunmawia, Consultant, SDG chuan Concept and overview of SDG in Mizoram and localization of SDG leh SDGs Indicator: National, State Indicator and District Indicators & Way Forward tih thupuite hmangin powerpoint presentation-in zirtirna a nei a ni.

Sustainable Development Goals (SDG) hian sawrkar department, a thawhpui leh behchhan tur 25 a nei a, chung zinga Lunglei district chhunga awm department hotu leh aiawhte he hunah hian an tel tha hle a. Zawhna leh chhanna hunt ha tak hman ho a ni.