Vawiin khan DC Conference Hall, Mamit-ah Dr. Lalrozama, IAS, District Bawrhsap hovin Mamit-a 31st Road Safety Week hman dan tur chungchang ngaihtuaha thutkhawm a ni.

Meeting-ah hian 31st Road Safety Week chu State pumpui rualin March Ni 16, 2020 zing Dar 6 :00-ah Siamliana Hall Charkawnah a hawnna neih nise tih a ni a. Road Safety Week hi March Ni 16 atanga Ni 22, 2020 chhung hman tur niin Week hawnna Programme-ah hian Mamit District chhunga Department hrang hrang, NGOs, Khawtlang hruaitute bakah Maxi Cab Driver leh Taxi Driver te sawm nise tih a ni a. Hemi ni-ah hian Driver-te chu Road Safety Week, 2020 thutiam laktir tura ruahmanna siam a ni bawk.

Kumin Road Safety Week thupui tur hi "Dan zawm hi himna a ni" tih a ni a. Mamit District-ah hlawhtling taka Week hman a nih theih nan mawhphurhna chanvo hrang hrang Meeting-ah hian insiam nghal a ni. Week chhung hian khawpui chhung kawn leh hmun remchang laiah MVI leh Traffic Police tangkawpin Motor check neih tura ruahmanna siam niin hemi Week chhung bikah hian Zero Tolerance anih dawn avangin lirthei neitu zawng zawngin Motor Documents-te kim leh fel taka nei turin leh Driver-te pawh Motor khalh fimkhur turin Committee chuan a ngen nghal a ni.

Vawiin thutkhawmah hian Mamit khawpui chhung kawngpui dunga traffic tibuai zawnga lirthei dah thin te, kawngpui tichep zawnga in sakna bungrua dah thin te bakah kawngpui dunga thil dang dang dah hnawk thin te chu Ni 16 March, 2020 ral hma ngeia an bungrua leh lirthei dahhnawkte an saseng theih nan District thuneitu-in hriattirna thuchhuah siam se Meeting-ah hian tih a ni a. Ni 16 March, 2020 hnulamah hi chuan Traffic Police te'n dan anga an fine tir tawh dawn avangin mipuite he hriattirna thuchhuah hi zawm hram hram turin Meeting hian a ngen nghal bawk.

Vawiin Meeting-ah hian District Road Safety Committee Members-te an tel tha hle a ni.