Vawiin khan Pu Lalchhandama Ralte, School Education Minister chuan Darlawn Helipad siam thar chu a hawng a, Darlawn khaw haw runpui GSA playground-ah a hmanpui nghal bawk.

Minister chuan Darlawn khaw haw runpuiah hian thusawiin thingtlang khaw tam tak a zuih zawnga an kal laia Darlawn khuain kum 118 hnuah hmar tlangdung khawpui a ni thei chu lawmawm a tih thu a sawi a. Darlawn khaw chhuak haw runpui an hmang thei chu a lawmpui thu leh hlu a tih thu a sawi a ni.

Minister chuan hmasawnna reng reng hi a innghahna chu zirna a ni tih sawiin thalaite chu ruihhlo lama tlan mai lova, zirna kawngah thahnemngai turin a chah. Hmar tlangdungin hmasawn turin zirna bakah kawngpui tha a mamawh a, Manipur lam kalpawhna te, Baga kalpawhna te sorkarin a buaipui mek a, Darlawn chu sumdawnna hmunpui a nih theih nan ngaihtuahna lo hmang lawk turin a chah a ni.

Darlawn mipuite chu khawtlang hmasawnna kawngah step dik zawh turin a fuih a, hmasawn tak tak turin khawtlang pawh inruahman a ngai tih sawiin Minister chuan sorkar leh vantlang tan hmun hma reserve lawk te pawh a tul tih a sawi a, tlangdung nu leh pa nih thiam turin a chah a ni. Darlawn khaw chhuak chhuanawm tak tak an awm tih sawiin tunah erawh chuan mi chhuanawm chhuak thar an vang ta tiin Minister chuan thangtharte chu rual u te hnungzuia tan la turin a sawm a ni.

Darlawn khaw haw runpuiah hian Minister Pu Lalchhandama Ralte hi Darlawn MZP, MSU leh Darlawn Educational Staff Association ten hmar tlangdung tana zirna tihhmasawnna atana a thawh nasat avanga lawmthu sawina leh chawimawina nan thuziak an hlan a. Darlawn Welfare, Aizawl ten a hnathawh that avanga chawimawi nan tawlhloh puan an bahtir bawk.

Darlawn khaw haw runpuiah hian Aizawl leh khaw hrang hrang atangin mi 700 chuang an haw khawm a, Darlawn khawtlang mipuite nen GSA playground ah hian hun an hmang a ni.