Higher & Technical Education Minister Dr. R. Lalthanglian’n vawiin khan hranghlui ziakmite Hrawva leh Lalmama te thu leh hla leh an sulhnu te zirhona ‘Two-Day International Seminar on Hrawva and Lalmama’ tih Government Aizawl North College a Mizo Department in an buatsaih chu a hmanpui.

Dr. R. Lalthangliana chuan Government Aizawl North College in hetiang mi ropui hmasa te puala  an thu leh hla zirhona an buatsaih chu lawmawm a tih thusawiin hnam fing leh ropui apiangin an pipute sulhnu leh chanchin te an ngaihlutna leh ngaihsan nachang a hria a, thang leh thar zelah pawh an zirtir thin a ni, a ti a. Hrawva leh Lalmama te sulhnu ah zirtur tam a awm tiin Mizo thu leh hla literature kan tih mai an thawhhlawk hle a,  an thu leh hla min hnutchhiah te hian hlutna tam tak an nei a, heng an kutchhuak ropui ah te hian thangthar ten zirtur tam tak kan nei, a ti.

Higher & Technical Education Minister chuan mi in eng ang pawhin dinhmun sang leh hna tha chelh sela mahse mahni hnam nihphung leh tawng te a pawchhuak theih loh anih chuan hlutna a nei kha kim lo tiin kawlkhawnte a bik takin college leh university zirlai Seminar chhim te chu mahni hnam ziarang leh nihphung te hria a, zirtir turin a chah a ni. 

Ni hnih awh ‘Two-Day International Seminar on Hrawva and Lalmama’ ah hian nimin khan Hrawva Ni tiin Hrawva thu leh hlaa thuziak lo lut te zirho a ni a, vawiin hi Lalmama Ni niin a sulhnu leh kutchhuak te chungchanga mi hrang hrang in paper an present te zirho a ni bawk a. Vawiina a Seminar hawnna inkhawm ah Myanmar atanga lokal Dr J. Khuma chu keynote speaker  a ni.