Vawiin chawhnu khan Health & Family Welfare Minister Dr. R. Lalthangliana hovin SAD Conference Hall, MINECO ah COVID-19(Corona Virus) chungchanga thuneihna sang State Level Task Force on Covid-19 chu an thukhawm a, Sawrkar inpuahchahna tawhna leh engemaw palha a vei hmuhchhuah ani a, hma lak dan tur an lo duan te, tihchak leh tihphuisui zawk dan te an rel. Meeting ah hian Dr. Z.R. Thiamsanga, MLA leh Vice Chairman, Health & Family Welfare Board, Chief Secretary Pu Lalnunmawia Chuaungo, Health Secretary Pu H. Lalengmawia leh Task Force member te bakah Assam Rifles leh BSF hotute te pawh an tel a ni.
Dr. R. Lalthangliana chuan khawvel pumin corona virus vanga hri leng hi an buaipui nasa a, Mizoram pawh a thei ang angin inven thawn thila Sawrkarin a inpuahchah tawh a, a tul angin heng inpuahchahna te pawh tichak zel a ni dawn a, a vei an awm palh a, enkawl dan tur kan ruahman tawh a. Mahse mipuiin Sawrkar an beisei dan ngaihtuah a hma lak a ngai a, ngaihtuahna kan sen tlan atan meeting hi koh kan ni, a ti a. He thila sum leh pai mamawh tur te chu a thei ang angin ngaituah a ni zel a ni dawn a, Sawrkarin he thilah hian theihtawp kan chhuah mek a ni, a ti a. Mipui te chiai lova thuthang awm palh thei te awih mai mai lo turin a chah bawk a ni.
Meeting ah hian Chief Secretary leh Health Secretary te chuan Sawrkar inpuahchah dan leh hma lo lawk tawh nate leh Mizorama he natna vei an la awm lo thu te an tarlang a. An thusawi ah ramri chheh vel, a bik takin Myanmar nen ramri ah Surveillance tih chak a tul bakah mipuiin nawlpuiin he thilah awareness a tam thei ang ber nei thei nan Awareness campaign a zau thei ang berah neih a tulm thu te an sawilang a ni.
Meeting chuan he natna vei rinhlehte, an in leh lovin a zirloh avanga harsatna nei te dah hranna turin Primary Health Centres(PHC) ah khum 3 theuh, Community Health Centres(CHC) ah kum 5 theuh leh Sub-Divisional Hospital (SDH) ah khum 5 theuh siam nise tih an rel a. Lengpui Airpot atana passenger lo thleng, he natna veini a rinhlelhte dahhranna turin Lengpui PHC a AYUSH building chu a tul anga thuamthat nise tih an rel bawk a. Zokhawthar ah Survelliance & Screening Centre ah darkar 24 duty in dah nise tih leh helai duty tur chu Zokhawthar hian awmchilh nise tih te an rel bakah ram dang atanga Mizoram rawn luh theihna khan(Entry point)-a screening tha zawk awm thei nan leh ram danga atang lokal mikhual insawisel te chu chak tak hriatchhuah a dahhran ani thei nan ramri a awm khaw hrang hranga YMA Branch leh VC te bakah paramilitary forces te tih tak zeta thawhpui nise an ti.
Meeting ah hian he natna chungchanga Training pekna turin Training of Trainers hmanga Delhi a kal mekten a hma thei ang berin H&FW Department leh private damdawi ina thawktute training a hma thei ang berah an lo haw hunah training pek nise tih rel ani a. Mipui hnena he natna chungchang zirtirna leh awareness hi a zau thei ang ber tih darh nan hma lak dan tur te pawh rel a ni bawk.
Corona virus chungchangah hian Sawrkar chuan January ni 31 khan State Level Task Force dinin chak tak leh a tul angin hma lakna a awm choh zel a. District tinah District Level Task Force Dc Chairna din a ni tawh bawk a, anni hian a tul angin hma an la zel bawk a. ZMC ah kum 32 leh District Hospital tinah kum 5 theuh Isolation Ward atan dah hran a ni a. Lengpui CHC, Aizawl Civil Hospital leh ZMC ah te Laboratory Sample Collection Centre siam niin sample lak te Guwahati ah thawn thei tura tih a ni a. State Level leh District Level ah te Rapid Response Team din a ni a, Lengpui Airport a uluk takin screening kalpui zel a ni.
