Vawiin khan ICT Department Minister Pu Robert Romawia Royte chuan Mizoram in IT zirna lama hma a sawn theih nan, Assembly Conference Hall-ah School 45 hnenah Computer Set 7, UPS 4 leh Printer 1 theuh a sem.

Minister Pu Robert Romawia Royte chuan School thlanchuah bik 45 chu a lawmpui tak zet a ni tih sawiin, computer set chuan zirna lamah pawh hma a sawn tir theih a beisei thu a sawi a, computer lamah an hriat la tam tawk lo mah se, tumna leh taimakna nen, a inzir chho zel theih a ni tiin school aiawha lokal zirtirtu leh zirlai naupangte chu a fuih a. Minister chuan zirlai naupang mai piahlamah khawtlang tan computer te chu hman tangkai a nih a duh thu leh a tul a nih chuan fee te pawh la in, computer awareness course te pawh Business Model hmangin an kalpui thei a ni, a ti a. ICT leh Education Department te chu department pawimawh tak, zirna lama Mizoram hmel ti danglam thei tura tan la thei tu tur Department te an nih bakah, Computer Education hmanga zirna tha zawk leh zirna tih that leh zual chu hmachawp tam tak te zingah a tel bawk a ni, tiin a sawi.

Implementing Agency hi Mizoram State e-Governance Society a ni a, North Eastern Council, Shillong hnuaia IT Education Programme for Schools atanga  sum hi hmuh a ni a, Project Cost hi Nuai Rs 1108.00 a ni. School 150 hnenah Computer hi pek tura ruahman  a ni a, school 31 ah pek tawh niin, vawiin hian school 45 ah pek a ni leh a, a bak school 74 ah pawh pek a nih theih nan turin NEC ah hma lak zel a ni ang.  

School pakhat a computer set hian CPU Band ACER, Processor i5 9^th Generation, RAM 4 GB, Harddisk 1 TB Space, CD Drive, Keyboard, Mouse, Monitor 18.5 inches, MS Office, Antivirus, Multi function Printer a keng tel a ni.