Vawiin khan Lawngtlai District Consultative Committee, District Level Review Committee leh District Level Security Committee chu Lawngtlai Additional DC Pu K. Laltlawmlova, MCS hovin Addl DC office chamber-ah an thu khawm.

He thut khawmah hian Lead District Manager Pi Lalhlupuii, RBI Aizawl Manager Pu Dhruba Jyoti Das leh NABARD Lungleia DDM Pu Evan T. Munsong bakah, bank hrang hrang leh line department ai awhte an tel.

He hunah hian kum 2019 October atanga December thla (3rd Quarter) chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni a. Bank leh mipui sum vawn himna (security) lam te, pawisa leng vel (currency management & remittance) chungchang te, khua leh tuite hamthat nana sawrkar laipui ruahmanna hrang hrang - PMAY (Housing for All), Women Self Help Group, loan chi hrang hrang leh social security scheme lama bank hma lak dan te sawi ho a ni bawk.

He thut khawmah hian pawisa thir, a bikin ₹ 10 thir hman a harsat chungchang leh dawrkaite'n an dawn duh loh thin chungchanga harsatna awm sut kian dan tur sawi ho a ni a. ₹ 10 thir chu sawrkarin hman theih tura a siam chhuah a nih avangin dawn leh hman a hlauhawm loh thu te, bank lamah ₹ 2000/- tling lo pawisa thir chu thleng a rem lo va, chutih rual chuan mahni account-a dah luh erawh a theih reng thu leh harsatna a awm loh thu tar lan a ni a. DCC thu khawm chuan mipuite chu pawisa nawi - ₹ 1 thir, ₹ 2 thir, ₹ 5 thir leh ₹ 10 thir te dawn leh hman tim lo turin a chah.

He thut khawmah hian agriculture kaihhnawih loan pek chhuah lama tan lak a tul thu pawh sawi lan niin, hemia hma sawnna a awm theih nan agriculture credit sub-group din a, DCC thut khawm ruala agriculture loan chungchanga hma lak dan tur sawi ho thin ni se, tih a ni a. Hei bakah hian zirna kaihhnawih leh mipui hamthatna hrang hrang puanzar kawngah pawh bank leh line department-te'n tan la leh zual se, tih a ni a. Mipuiin loan lak theih leh sawrkar ruahmanna hrang hrang an hriat theih nan financial literacy camp (FLC) a tam thei ang ber buatsaih leh chuti ang lam sawi hona programme cable TV kal tlanga buatsaih te pawh rel a ni.