Chapchar Kut 2020 chu vawiin khan Sipai Lammualah ropui taka lawm tan a ni a, Chapchar Kut lawmna ni khatnaah hian Art & Culture Minister Pu R. Lalzirliana chu Kut Pa a ni a, Art & Culture Director Pu R. Hmingthanzuala chu Kut thlengtu a ni.

Kut Pa Minister Pu Lalzirliana chuan kan Kutpui ti a kan sawi thin he Chapchar Kut hi Zofa te hian eng ang takin nge kan hmuah a, eng ang takin nge kan nunah nghawng a neih kan in enlet a ngai a ni tiin a sawi a. Zofate tana hun hlimawm tak a nih laiin, a hlimhlawp lam ringawtah hian kan kalral ang tih a hlauhawm hle a, heng hunpui te hi kan hnam nunphung leh ziarangte, kan hnam nun zemawi leh induhsak tawnna te ngaihhlutna leh chawisanna hun ni thei se a duh thu a sawi a, zofate hmasawn tura min chawk phurtu leh thenawm khawveng, ram leh hnam hmangaihna rilru thar min neihtirtu ni thei se tiin duhthu a sam thin thu a sawi.

Kut Pa chuan     mahni hnam ziarang leh chin dan te ngaisanglo hnam reng rengin an nunphung an hloh a, pumkhata siamtu leh hnam thui khawmtu an culture hnualsuattu te chu awlsam tak a an chhehvel hnamdang te nekchep leh chimral an ni mai thin tih sawiin, mizo te kan vanneih em em na chu, pawl ropui tak YMA Pathianin min dinsak hi a ni a ti a, he pawl hmang hian mizo nunze mawi leh zirtirna tha tak takte vawn nun a ni zel a, chutih rualin kan inenkawlna ah pawh hian, kan tobul kan thlir let fo hi a tul ta hle a ni, a ti.

Hmeithai leh mi rethei dawmzui kawnga pi leh pute rilru put dan te, aia upate an zahthiam em em dan te kha entawn tlak tak a tling tih sawiin, tlawmngaihna, inzah tawnna te, inpawisak tlan dial dial te leh upa zah thiam hian khawsakho a tinuam a, a hahdam thlak a, mizo society kal zel tan pawh a pawimawh em em a ni tih sawiin  "zonun zemawi" kan  chhawm nun zel chuan nun ho a hahdam anga, khawsakho a hlimawm ang a, kan hnam damna a ni ngei ang a ti a ni.

Vawiin Chapchar Kut lawmnaah hian  Kut Thlengtu Pu R. Hmingthanzuala chuan thuhma sawiin, CYMA General Secretary Prof. Lalnuntluanga chuan kalkhawmte lawmna thu a sawi a; ani bakah hian Chapchar Kut Organizing Committee in Mizoram pawn atanga Kut hmang tura an sawm Tidim, Tahan, Falam, Manipur, Tripura, Shillong, Haflong leh Silchar atanga lo kal te hnen atang thusawi ngaihthlak a ni bawk. Vawiin Kut lawmnaah hian CYMA buatsaihin Mizo Infiamna hrang hrang entir a ni a, hnam lam hrang hrang thlir ho a nih bakah hla leh rimawi ngaihthlak a ni bawk.

Chapchar Kut 2020 lawmna hi kawng hrang hrangin kalpui a ni a. Tukin dar sarih khan "Chapchar Kut Run" buatsaih niin Sikulpuikawn leh Chanmari kawn atanga tlan in Sipai Lammual ah intawhkhawm a ni a, Forest Minister Pu TJ Lalnuntluanga hovin hun hman a ni a. Nimin atang khan Vanapa Hall-ah Art Exhibition buatsaih a ni a, Aijal Club Park ah Flower Show & Fair buatsaih niin, AR Lammual Basketball ground-ah Food Court leh Handloom & Handicraft stall siam a ni a, ASEAN Ambassador te pawh vawiin khan Chapchar kut chhim turin an lo thleng a ni.

Naktuk chawhma dar 10:30-ah Sipai Lammualah hian Chapchar Kut lawmna hi chhunzawm a ni ang.