Tukin dar 7:00 khan Chapchar Kut lawmna Tlan programme chu A.R. Lammual ah neih niin, he hun hi Tv. Lalhmachhuana, Vice-President, Central YMA-in kaihruaiin, Pu TJ. Lalnuntluanga, MoS for Law & Judicial etc. chuan khuallian niin he hun hi a hmanpui.

Chapchar Kut lawmna puala Tlan programme a khuallian Minister, Pu TJ Lalnuntluanga chuan thusawiin, Kum 2020 Chapchar Kut lawmna hun hmang thei tura min hruai thlengtu Pathian hnenah lawmthu a sawi a. Chapchar Kut denchhen a TLAN programme buatsaih a ni chu Organising Committee te remruatna  fakawm a tih thu a sawi. Pu Manuna chuan Physical Fitness hi mihringte mamawh tak a ni a, mahni taksa sawizawi hi damdawi man tam tak tak a lei aiin a hlu zawk a ni a ti.

Khuallian, Pu Manuna chuan Chapchar Kut thupui “Zonun Ze Mawi Chawisan” tih chu a pawimawh hle a ni tih sawiin, kan hnam nunzia leh ziarang te chhunzawm zel a, mahni hnam nihna zahpui lo turin kalkhawmte a sawm a. Mizote hi Pathianin a duh ang taka a din kan ni  a ti bawk. Korean emaw, Vai emaw, Sap ah emaw kan piangthar thut ngai dawn lova, Mizo kan ni reng dawn a, chuvang chuan kan hnam ziarang, kan nunphung leh kan zo nun zemawi chawisang thei tura kan Hnam nihna zahpui lo tura kan inbuatsaih a pawimawh a ni a ti bawk.

Khuallian chuan Hnam dang ngaihsan leh entawn luat avanga Zo zia theihnghilh lo tur leh hnam zia kalsan lo tura kalkhawmte fuihin, chungnunna thinlung pu turin a chah a. Mizotawng thiam miah lova kan ram a rawn lute pawh tlangnel leh ngampa taka an rawn khawsa thei a nih chuan Mizote hian khawvel hmuntinah hnam chungnung bik kan nihna thinlung kan put thar deuh deuh a, kan lan chhuahtir a ngai a ni a ti bawk.

Khuallian chuan Mizoram Sawrkarin Zofate inpumkhatna a ngai pawimawh hle a ni tih sawiin, YMA hruaitute leh kalkhawm te chuan ‘Kan Ram’ kan tih hian kan chenna, Mizoram a dung Mel 200 leh a vang mel 100 chauh kan rilru a lang lovin, zohnahthlak hnam peng hrang hrangte awmna hmun chu “Mizoram” a ni tih rilru pu turin a chah , inunauna siam tha a theihtawp chhuah turin a fuih thar bawk.

Attachment

  • Loading attachment...