Vawiin chawhnu khan I&PR Conference Hall, CHANEM, Champhaiah tunhnaia Mizoram sawrkarin Chanchinbumite puala Press Study Tour a buatsaih zawh takte thlirletna neih a ni.
He hun hi Dr Lallawmkima, DIPRO Champhai chuan kaihruaiin, Sawrkarin I&PR Department kaltlanga Chanchinbumite puala sawrkar hmalakna State chhung leh pawn lam thlenga tlawha zirchianna hun a huaihawt thin chuan Chanchinbumite nasa taka a puih thu a sawi a. Hmasawnna leh thiamna sang zelah inzirthara intuaihriam reng a ngai thin a, mamawhte hriaa sawrkarin hun tha leh duhawm tak a buatsaih thin kawngah lawmthu a sawi a ni.
MJA Champhai District President Pu Lalhmingmawia Pachuau pawhin thusawiin, Press Study Tour neih zawh takte thlirletna hun siam a ni chu thil lawmawm leh chhinchhiahtlak tak a ni, a ti a. I&PR Department leh Chanchinbumite inkara thawhhona tha tak awm chu chhuanawm a tih thu leh inkawmngeiha thawhhona tha tak chhawmnun zel a beisei thu a sawi bawk.
He hunah hian MJA Champhai District member Press Study Tour kalte hnen atangin report ngaihnawm tak ngaihthlak a ni a. Pu Lalhmingliana, Treasurer, MJA Champhai District hnen atangin January chawlkar hnihna hmanga Karnataka State fan chungchang report ngaihthlak niin, Pu Lalhlupuia, Vice President, MJA Champhai District chuan Champhai District Press Study Tour Team te’n Khawbung RD Block huamchhunga sawrkar hmalakna January Ni 20-22 chhunga tlawh report a pe a. Pu Lalhmingmawia Pachuau, President MJA Champhai District hnen atangin Kerala State zin report ngaihthlak a ni bawk.
Chanchinbumite chuan Sawrkarin Press Study Tour kaltlanga intuaihriamna leh inzirna hun tha a buatsaih sak thin chu lawmawm tiin, hlawkpuiawm an tih thu an sawi a. Zawngchhang thlak hle a an hriat thu leh nakin zelah pawh neih chhunzawm an beisei thu an tarlang a ni.
