Vawiin khan Lunglei Thuamluaia Mual-ah ‘Zonun ze mawi chawi san’, tih thupuia hmangin Chapchar Kut 2020 chu ropui taka lawm a ni a, Pu R. Vanrengpuia, Additional DC Lunglei chu Kut thlengtu niin Lunglei HPC Vice Chairman Pu Lawmawma Tochhawng chu Kut Pa a ni. Kut Pa hi 2nd Battalion MAP Pipe Band ten an lo lawm a ni.

Kut Pa Pu Lawmawma Tochhawng chuan Chapchar Kut hmang tura kalkhawm zawng zawng te duhsakna chibai bukin Kut ropui taka hman anih theihna tura Chapchar Kut Organizing Committee-te inpuahchahna chu fakawm a tih thu a sawi a. Mizo hnamin Kut kan neih hlu ber, kum tina ropui taka kan lawm Chapchar Kut chuan Zofate inpumkhtana min pe a, min tel khawm hi a hlu takzet a ni tiin Chapchar Kut chu hnam inpumkhatna leh inlungrualna thlentu pawimawh tak a ni, a ti a. Hnam chak leh ngelnghet ni tur chuan sakhua leh hnam zia nunpui tlat a tul bakah ei leh bara kan intodelh a tul a ni, a ti bawk. Chapchar Kut thupui thlan ‘Zonun ze mawi chawi san’ vawng nung turin mawhphurna kan nei theuh a ni tiin Chapchar Kut hmang tura kalkhawmte chu Kut nuam leh hlawkthlak tak hmang theuh turin duhsakna a hlan a ni.

Chapchar Kut thlengtu, Pu R. Vanrengpuia chuan Kut hmang tura kalkhawmte  lawmna thu sawiin chibai a buk a. Hmasawnna leh changkanna pawhin a chim bo zawh loh, vawiin thlenga chhawm nuna awm Chapchar Kut Mizoten kan nei chu a nihlawhthlak thu a sawi.

Chapchar Kut hawnna inkhawm ah hian Rev Lalremsiama Fanai, BCM chuan hunserh hmangin Pu Ngurthansanga Sailo, Secretary Chapchar Kut Organizing Committee atangin report ngaihthlak a ni.

Vawiin Chapchar Kut lawmna ah hian Lunglei khawpui leh a chhehvel khaw mipui thahnem tak kalkhawmin YMA Sub Hqrs Lunglei Zaipawl, MZI Zaipawl, Branch YMA hrang hrang atangte, MHIP, MCAA leh MCO lam atang ten malzai, zaipawl, rimawi tum leh hnam lam ngaihtlaka thlirho a ni a. Mizo hnamlam pholan zingah Parlam, Sarlamkai, Sing sing tang lam, Chheih lam leh Chai, Cheraw te entir a ni. Tin, Mara Thyutlia-Py Hqrs Siaha atangin hnam lam entir a ni a. Kum danga lo tih thin tawh angin MJA Lunglei ten Chapchar Kut Miss an thlang a. Lunglei Photographers’ Association ten Kut Hraite an thlan bakah Photo Booth leh Photograph Exhibition an buatsaih a. Tin, kuminah a vawikhatna atan Lunglei Entrepreneur Forum ten stall siamin an thilsiam chhuah – kawr, bag, pickle, cake, thei tui, masala, fridge magnet, key chain leh eitur hrang hrangte an zuar a, mipuiten an hlut hle a ni.