Vawiin Tahrik Ni 6, Vau thla khan  District Sports Complex, Champhaiah Sub-Hqrs. YMA Champhai  kaihhruainain Chapchar Kut 2020, Zonun ze mawi chawisan tih thupui hmangin ropui taka lawm a ni.  He hunah hian Dr. ZR Thiamsanga, Hon’ble MLA & Vice Chairman, Health & Family Welfare Board, Government of Mizoram  chu Kut Pa a ni a, Pu VL Chama Hnamte, President , SYMA Champhai chu Kut thlengtu niin, Champhai Bawrhsap Pu SL Naveen, IAS chu Kut Uaptu a ni.

Kut Pa Dr. ZR Thiamsanga chuan Chapchar Kut chhim tura kalkhawmte chibai bukin, Chapchar Kut chu Mizote kut neih zinga ropui leh lian ber, Lo vah awllen  laia hman thin, zum leh hriam laka an chhuah atanga lawmthu sawina atana hman thin a ni, a ti a. Chapchar Kut chu tunhma lam chuan ni 5 atanga ni 7 chhung pipu ten hlim takin an hmang thin a,  ei leh in lamah  induhsakna an inhlan tawn a,  hnam thuam mawi takin an inchei thin a ni, a ti a. Hlimna kut pui anih angin tumah an inhau ngai lo a, zinchhuah leh hmun danga hun hman an phallo a ni, a ti bawk.  Chapchar Kut chuan Zoramah  lungrualna thlen ngei se a duhawm hle ang tiin, khawvel hmaa Mizo kan nihna lantirtu pawimawh leh hnam kalphungte kan tarlannna pakhat anih thu a sawi bawk.

Kut Pa chuan Mizo hnam ziarang leh tih dan phungte hlutna chang kan hriat thar leh angaih thu sawiin, khawvel hnam changkang zawkte tihdan kan lak nasat luatah kan hnam rohlu pawimawh tak tak ten min kiamsan a, hnam anga kan dinchhuah a har hle dawn a ni tiin, kalkhawmte chu thang thar zel te  hnam nunmawi leh ziarangte zirtir chhawng  zel turin a chah a. Sawrkar laipuia Ministry of  Tribal  leh  Art and Culture Department Mizoram te'n  hnam zirang humhalh nan tan theihtawpa tan an lak thu tarlangin, hnam zia leh rohlu chawinun hna chu mitlemte kutah ni lovin kan zavai kutah a inghah tlat thu a sawi a. Dr. ZR Thiamsanga chuan Champhai khawpui chu hnam ziarang chawinung kawnga thawhhlawk tak anih thu pawh tarlangin, Chapchar Kut chuan Zofate zingah inlungrualna leh inunauna thlen ngei se a duh thu a sawi a. Champhai mipuite Chapchar Kut hlimawm tak hmang theuh turin duhsakna a hlan a ni. 

Vawiin Chapchar Kut lawmnaah hian Pu PC Lalrawnliana, Secretary, SYMA chuan report a pek hnuah, Kut thlengtu Pu VL Chama Hnamte, SYMA President  chuan kut hmangtute lawmna thu a sawi a.  Kut lawmna hunah hian Sub-Hqrts. YMA Champhai thuthmun huamchhunga Branch YMA hrang hrang atangte, Zomi Cultural Society (ZCS), Sub Hqtrs MHIP, MZI leh MUP  lam atang te'n  malzai, zaipawl, rimawi tum, Lemchan leh hnam lam benglut tak takte ngaihtlaka thlirho a ni a. Chai a Kut hun kharna hman a ni.

Chapchar Kut puala lawmman hrang hrangte sem a  ni a. Sawrkar Pisa  Kut hma kara Mizo thuama inthuam  thazualte hnenah lawmman hlan a ni a. Pakhatna chu District Agricultute Office leh DIET Champhai, pahnihna chu SE Office, P&E leh EE Office, PHE an ni a, pathumna chu Minor Irrigation & Water Resources Office leh Land Revenue  & Settlement Office te an nih bakah DC Office chu Special Award hlan an ni.

Heng bakah hian Kut lawm tura lokal Naupang kum 6 hnuailam Mizo hnam incheia inchei nalh mipa leh hmeichhe naupang thlan chhuahte hnenah lawmman sem anih bakah Chapchar Kut Miss 2020  hnenah lawmman hlan a ni bawk. Chapchar Kut hi Mipui ten an hlut hle a ni.