Vawiin khan GSA Playground, Mamit-ah Chapchar Kut 2020 ropui taka hman a ni a. Dr. Lalrozama, IAS, District Bawrhsap chu Kut pa niin Pu K. Eley Rosanga, President, Sub Hqrs YMA Mamit chu Kut thlengtu a ni.

Kut pa chuan Chapchar Kut hmang tura kalkhawm zawng zawngte hnenah duhsakna chibai bukin Pathian zahngaihna azarah boruak nuam tak hnuaia Kut hman a ni chu lawmawm a tih thu a sawi. Chapchar Kut chu hlimna Kut a ni a, inunauna leh induhsakna lantirna atana hman tum theuh tur leh kan hnam culture vawnghim tura kan intuaitharna atana hmang turin kalkhawmte a chah a. Kumin kan Chapchar Kut thupui "Zo nun ze mawi chawisan" tih anih anga tlawmngaihna leh rinawmna chawisang a, nunpuitu nih tum zel tur leh aia upa zawkte zah nachang hre thar turin kalkhawm mipuite a chah a. Kan ram chuan tih takzeta Pathian kan hriat a tul thu sawiin Mamit District-a chengte chuan Potential kan nei tha a, District hnufual kan nihna pawh mipuite'n kan zir chuan hma kan sawn dawn a ni a ti. Kut hmang tura kalkhawm mipuite chu kan ze tha lai pholang a, midangte tana hlimna leh malsawmna thlentu nih tum theuh turin duhsakna a hlan bawk.

Kut thlengtu Pu K. Eley Rosanga pawhin thu sawiin pi leh pute atanga uar taka Mizo te'n kan hman thin, kan Kut ropui ber chu hlimna Kut anih angin midang tana malsawmna thlentu nih tum turin a chah a. Zo nun ze mawi chhawmnung zel tur leh kan Mizo thuam hrang hrangte pawh theihtawpa humhalh a, chawinung thar zel tur leh Kristian nun dan tha chawisangtu nih tum theuh turin kalkhawmte duhsakna a hlan a ni.

Mamit-a Chapchar Kut hmanna-ah hian khawpui chhung YMA Branch hrang hrang bakah Dampui Branch YMA atangin Cheraw Bu 17 entir a ni a. MHIP Sub Hqrs Mamit hnuaia Branch hrang hrangte atangin Parlam leh Siktuithiang lam entir a ni bawk a. Mamit khawpui chhunga YMA Branch hrang hrangte hian hnam lam chi hrang hrang entirin zaithiamte'n zaiin mipui an awi bawk a ni.

Vawiina Chapchar Kut Mamit-a hmannaah hian Mizo infiamna hrang hrang, Insuknawr, Insukherh, Insaihruipawh, Inbuan, Kalchhet inkal siak bakah Arpa insual te entir a ni a. Chapchar Kut pual hian Kut nula leh Kut naupang thlanna neih a ni bawk.

Mamit-a Chapchar Kut hmannaah hian khawpui chhung YMA Branch hrang hrang bakah Tripura Group YMA, Chhawrpial Cultural Club Kawrthah leh West Phaileng Jt. YMA te sawm an ni.