Vawiin chawhma khan Kolasib District Chapchar Kut 2020 lawmna chu Diakkawn khelmual, Kolasibah neih niin Minister Pu Lalruatkima chu Kut Pa a ni a, mizo tlawmngaihna chawi nungtu ni zel turin Kut lawm a kalkhawmte chu a chah.

Kut Pa Pu Lalruatkima chuan kan pi leh pute hunlai a Chapchar Kut hman tan a lo nih dan tlangpui te sawiin kum 1974 a Art & Culture department pian hnuah phei chuan ram pumah mumal tak a hman a lo nih chhoh tak thu a sawi a,” Mizo hnam ziarang vawn himna atan mai bak ah ram pawn atang a zin mite hipna hmanraw pawimawh tak a kan hmang ta zel hi a lawmawm hle a ni” a ti. Minister chuan khawvel hmasawnna hrang hrang avang a kan hnam ziarang tha tam tak te kan kalsan mai loh nan Chapchar Kut 2020 thupui ‘Zo nun ze mawi chawi san’ tih kan hmang chu a pawimawh thu a sawi a, Zo nun ze mawi tlawmngaihna, rinawmna, taimakna, dikna, huaisenna leh mi te tan a inpekna te hi uar zawk a tilangtu ni turin Kut chhimtute chu a chah a ni. Pu Lalruatkima chuan khua leh tui tha ni tur a mi tinin mawphurna kan neih ang angte chu hlenchhuak theuh turin a chah a, faina lam a hmasawnna uar turin leh ram kang tur ven kawngahte kan phaktawk theuh ah tan la tlang turin a chah bawk.

Kut Thlengtu Pi Sangchhin Chinzah, Deputy Commissioner, Kolasib District chuan kalkhawmte lawmna thu sawiin Chapchar Kut 2020 lawmna hun chu Zo nun ze mawi, aia upa zah thiamnate, tlawmngaihna leh rinawmna te lanchhuahtirna hun leh inzirtirna hun tha a hmang turin kalkhawmte a sawm bawk a ni.

Pu C Liankunga, Chairman, Kolasib District Chapchar Kut Working Committee pawhin thu sawiin Chapchar Kut chu mizo hnam ziarang phochhuahna hun pawimawh tak a nih bak ah khawtlang inpumkhatna atan a hun tha a nih thu a sawi a, Kolasib district Chapchar Kut lawmna atan a khawtlang tlawmngai pawl hrang hrangte thawhrimna leh Kolasib district a sawrkar hnathawkte inpekna fakawm a tih thu a sawi bawk.

Kolasib District Chapchar Kut lawmnaah hian mizo hnam lam hrang hrangte entir a ni a, Kolasib District chhunga zaithiam ten hun hmangin Kut pual a thlalakna tur hmunte siam a ni bawk a ni. Kut lawmnaah hian chaw fak hun te siam niin kut chhimtute chuan chaw an fun a, a duh apiangte tel thei turin chai hunte siam a ni. Kolasib district tihmingthatu a thlanchhuah Nula Lalremsiami, FIH Women’s Rising Star of the Year Award 2019 hnenah chawimawina hlanna hun hman a ni bawk a ni.