Vawiin khan DTO, Lunglei Office-ah Khuallian Transport Secretary Pu Hrangtawna, IRTS chuan lirthei khalhtu/lirthei neitu te tan Driving Licence leh Motor Registration Smart Card hmanga thlakna/siamna a hawng.

Smart Card hawnna inkhawm Transport Department Director Pu L.Biakthanga kaihhruaiah Khuallian Pu Hrangtawna chuan driving licence leh motor registration chu Smart Card hmanga tih vek tawh tur thu a sawi a. Computer-ah Smart Card neitu nihna kimchang taka chhinchhiah a ni ang a, India ram khawi hmun atang pawhin a hriat thei dawn a, tawhsual tawh leh lirthei bo chungchangah pawh harsatna awm thin tam tak chu Smart Card hman a nih chuan awlsam zawka chinfel a ni thei dawn a ni, a ti.

Khualzahawm Lunglei Addl. DC Pu Rothuama pawhin Lunglei-ah Smart Card System chu mumal zawka kalpui a ni thei dawn ta chu a lawmawm a tih thu a sawi a, lirthei neitu/khalhtu te chuan Smart Card hmanga lirthei leh licence register vek turin a chah bawk.

Lunglei-ah hian Smart Card siam hna hi M/S A-ID System Pvt. Ltd, Mysore ten an thawk mek a, nikum atanga an hna tan tawh chu khawl that loh avangin engemaw chen an chawlsan hnuah khawl thar nen changtlung zawka kalpui turin an inbuatsaih a ni. Lunglei khawpui chhungah hian lirthei 474 registeration tih tawh niin driving licence 1010 register a ni tawh bawk.