Republic of China (Taiwan) palai Representative Amb. Chung Kwang Tien leh Taipei Economic and Cultural Center In India a hotu pahnih te chuan nimin khan State Guest House ah tualchhung thuthar thehdarhtu te an kawm.

Chanchinbumite kawmin Amb. Chung Kwang Tien chuan Republic of China (Taiwan) chu Mizoram ang thova tlangram a nih thu te, loneih atanga thilsiamna, a bik takin technology kawnga khawvel hriat an hlawh chhoh dan chanchin te, ram te reuhte nimahsela khawvel economy lian tehna kawnga 18-na an nih thu te sawiin Mizorama Chapchar Kut chhim tura amah leh a hote Sawrkarin an sawmnaah lawmthu a sawi a. Tunhmain an ramah loneimi za zela 60 ni thin chu tunah za zelah 5 an nih thu te sawiin tlangram loneih dan kawnga an tawnhriatte Mizoramin a chhawr theihna awm thei te dappui turin loneih lama thiamna sang nei Taiwan mi pahnih chuan March thla laihawl velah Mizoram an rawn tlawh dawn a ni, a ti a. Mau hmanga thilsiamna kawngah Taiwan chu hmahruaitu anih thu sawiin hemi lama Mizo themthiamte leh hetiang lama tui mite chu Taiwan tlawha heng te hi rawn en turin a sawm a. Taiwan Sawrkar in India mite tan zirna kawnga Scholarship a pek thin chu Mizo zirlai pawhin dil ve thin se a ti a, hemi bakah hian Mizoram University chuan Chinese tawng Mandarin zirna kawnga hma an lak duh phawt chuan kawng a awm thei dawn nia a hriat thu te a sawi.

He inkawmhonaa tel ve Taipei Economic and Cultural Center in India hnuaia Science & Technology Division a Director Dr. James H. C. Chang chuan Taiwan chu tlangram leh thliarkar anih avangin chhiatrupna thleng thei lirnghing, thli tleh leh leimin te an tawng fo thin, chumi avanga tunlai thiamna hmanga heng chhiatna thleng thei tur hrilhlawkna leh invenna kawnga hma an lak dante South East ram te an zirtir ve thin thu sawiin hetiang training an neih leh hunah Mizoram mithiamte rawn dil ve turin a duhthu a sawi. Science leh Technology kawng hrang hrangah Taiwan chu hmahruaitu anih dante sawiin an rama zir turin Mizoram thalai te a duhthu a sawi bawk.