Vawiin khan Statistic Day vawi 12 na chu Economic & Statistic Department Office Lungleiah hman a ni a, thupui atan 'Quality Assurance in Official Statistics' tih hman a ni. He hun hi Lunglei District Research Officer Pu C. Vanlalmuana'n a kaihruai a, thu sawiin ram hmasawnna leh changkanna tak tak nei tur chuan Statistic, tha, dik leh rintlak kan neih a ngai a, Sawrkar pawhin a ram mite tan hmasawnna hna tha taka a thawh theihnan statistic dik a mamawh a ni a ti a, Statistic dik leh rintlak nei tur chuan thawktu ten taima taka an thawh mai bakah mipui thlawpna leh thawhpuina an mamawh hle a ni, a ti. A sawi zelnaah Pu Vanlalmuana chuan statistic siamna kawngah hian hmun thenkhatah hrethiam lo leh hlauhawm ang zawnga ngai mi thenkhat an awm thin a, heng hian statistic dik siamna kawngah harsatna nasa tak a thlen thei a, dik leh fel zawka mipui te pawhin zawhna chhanna kan pek a pawimawh fo thin a ni a ti. 

Economics & Statistic Department hian Lunglei District Profile 2017 an siam chu tun hnai khan an peih fel tawh a, Lunglei District chhunga BPL Baseline Survey 2016 pawh tlangzarh tawh niin hei hi Official a hman reng tawh tur a nih thu an sawi bawk. Statistic Day 2018 puala hun hmanah hian Pu C. Lalhmangaiha, Sub Inspector Economic & Statistic Dept. Lunglei pawhin Statistic Day hmanna chhan sawi fiahin Professor Prasanta Chandra Mahalanobis chanchin tlangpui chhiar chhuahna hun a hmang bawk a ni.