Vawiin chawhma khan Government J Buana College, Bazar Veng, Lunglei-ah Department of Sports and Youth Services buatsaihin thisen pek runpui ‘Voluntary Blood Donation Drive’ hawnna programme neih a ni. Lunglei DC Pi Lalzarmawii, IAS chuan khuallian niin a  hmanpui.

Vawiin thisen pek runpui programme Pu Lalrotluanga, Associate Professor, Govt JB College kaihhruaiah hian SYS Department hnuaia Sports discipline hrang hrang, Scouts & Guides, Adventure Wing NCC, NSS atanga kalkhawm mi 300 chuangin thisen pe turin hming an pe a. Lunglei Civil Hospital leh Christian Hospital, Serkawn atanga Doctor rual ten  Blood Donation Drive hi an kaihruai.

Pi Lalzarmawii chuan thisen pek hi thil hlauhawm a ni lo tih mipuite’n kan hriat a tul a ni tiin thisen hi midangte nun hlu tak chhanhim theihna hmanraw pawimawh tak a ni, a ti. Damlo te hman tur thisen a thlawna pe tura vawiin Blood Donation Drive a thalai rual kalkhawmte chu chhuanawm a tih thu sawiin thisen pek hlut zia chu an khua leh veng theuha nasa taka thehdarh turin a chah a. Lunglei DC chuan Mizo zinga Blood Transfusion lama specialist hmasa ber Dr ST Lalhriatpuii Lunglei Blood Bank a thawk tura sawrkarin a dah chu Lunglei mipui te tan malsawmna hlu tak a ni, a ti bawk.

Pu C. Lalremsanga, DS&YO, Lunglei pawhin kalkhawmte lawmna thu sawiin chanhai zawk leh harsa zawk thisen mamawhte Mizoram thalaiten an tanpui theihna turin he programme-hi huaihawt a ni, a ti a. Thisen pek hi taksa in a chauh phah lo a ni tiin Pu C. Lalremsanga chuan amah ngei pawhin vawi 46 thisen a lo pe tawh tih a sawi a. Thalai rual kalkhawmte chu thisen pek kawngah tan la a, midangte tana malawsawmna thlen tu ni tura tan la turin a chah bawk.

Vawiin programme-ah hian Govt J Buana College zirlai T. Lalremmawii, 5^th Semester, thisen vawi-8 pe tawh chu chawimawi niin Govt J Buana College Principal Prof. J. Zorema’n citation leh pawisa fai Rs.1000/- a hlan a ni.