Urban Development & Poverty Alleviation Department chuan kumin 2017 hian Khawpui Fai Inelna a buatsaih dawn a, District Capital te Category-I-ah dah in Census Town te Category-II dah a nih angin Hnahthial khawpui pawh Census Town a nih angin nimin chawhma dar 11:00 khan Pi Lalhruaitluangi, MCS SDO (C) & BDO chuan Hnahthial khawpui chhunga Head of Offices te, khawtlang hruaitu VC te, NGO hrang hrang hruaitu leh MJA te meeting neihpuiin hmalak dan tur an rel ho a ni. Meeting-ah hian mi 50 an tel.

Chairman Pi Lalhruaitluangi chuan khawpui fai inelna turah hian theih tawp kan chhuah phawt chuan Hnahthial chu Pakhatna kan nih theih tur thu sawiin, Lunglei District lama hotute pawhin chu chu an beisei dan a nih thu te, inelna buatsaihna a nih dan sawiin tun tum hi a vawi khatna tur a ni dawn bakah ranking siamna tur a ni dawn a, inelna hi a awm leh hma chuan he ranking hi rin tur a nih tur thu te a sawi a, hemi bakah District chhung a khawpui fai inelna a hranpa a neih tur thu te, endik dan turte a sawifiah hnuah hmalak dan tur ngaihtuah ho nghal a ni. 

Hnahthial khawpui hian SDO (C) kaihhruaina in Hnahthial Town Sanitation Committee chu kum 2009 October thla khan din a ni a, hemi kum vek hian dumping ground siamin a thla leh November thla atang khan lirthei hmangin bawlhhlawh paih tan a ni a, lirthei hman man hi chhungtin in Rs. 10 an thawh thin a, thil man san an zelin tunah hian Rs. 20 in khawn mek a, veng tin-ah Branch YMA leh VC te kaihhruaina in Sanitation Committee din vek a ni bawk. Hemi bakah 'Kan Fai Zel Dawn' tih thupui neiin Clean Hnahthial Committee chu SDO (C) kaihhruaina hnuaiah tho kum 2016 khan din a ni leh a, khawlai bawlhhlawh bawm (dusbin) engemaw zat an dah tawh a, an dah belh mek zel bawk a, bawlhhlawh bawm te hi donation atanga an lei vek a ni a, hemi bakah Clean Hnahthial Committee hian khaw pum huapin khawlai thenfai hnatlang an ko thin bawk a, kum tluana Veng, Office leh Zirna in fai inelna an buatsaih a ni a, endik reng a ni bawk thin a, kumin Independence Day khan lawmman te hi sem a ni.