1480/2022-2023

Lunglei the 5th August, 2022: Vawiin khan DC Conference Hall, Lunglei-ah National Commission for Protection of Child Rights (NCPCR), State Commission for Protection of Child Rights (SCPCR) leh District Administration, Lunglei buatsaihin naupang ruk bo leh sumdawnna atana hman laka invenna chungchang zirhona ‘Workshop on Combating Child Trafficking in 75 Bordering Districts of India on the occasion of World Day Against Human Trafficking’ neih a ni.

Lunglei DC Pu Kulothungan A chuan kalkhawmte lawmna thu sawiin Lunglei District chu international border hrula awm anih angin international child trafficking hial pawh thil thleng thei anih avangin hemi chungchang hi mipuite kan zirtir uar a, a kaihhnawih Department-te pawh kan tanrual a tul takzet a ni a ti.

Lunglei SP Pu Rex Zarzoliana Vawnchhawng pawhin thu sawiin India ram state dang te khaikhinin Mizoramah human trafficking case tam lo mah se kum tin deuh thaw case kan neih thu leh international trafficking ti thin ten Mizoram chu kalkawng (transit) ah an hman thin thu a sawi a. Human trafficking do let turin Mizoram Police hnuaiah Anti-Human Trafficking Unit din niin Lunglei district-ah pawh he unit hi a awm thu leh a tul anga hmalak thin anih thu a sawi a. Lungei District huamchhunga school hrang hrangah Legal Awareness (POCSO Act, COTP Act, MV Act, Drug abuse, human trafficking etc) Campaign neih thin anih thu a sawi bawk.

He workshop ah hian Pi Anshu Sharma, NCPCR chu Resource Person niin naupang dikna chanvo hrang hrang bakah naupang rukbo an nih loh nana hmalak dan tur leh inven dan tur zirhona neih a ni a. Naupang rukbo an ni tih hriat veleh FIR thehluh vat a, darkar khat chhunga a zawn hna thawh chu thil pawimawh ber a nih thu a sawi. Human trafficking chu ruihhlo leh ralthuam tawlh ruk dawtah khawvela international organized crime lian tham ber pathumna anih thu leh kum tinin case a pung zel thu a sawi a. India ramah pawh human trafficking hi a hluar hle a, kum 2020 khan ram pumah human trafficking case 1714 register niin hemi kaihhnawih ah hian mi 4966 man an ni a. Human Trafficking Case tam zawk chu report loh anih thu leh National Crime Records Bureau (NCRB), Ministry of Home Affairs chuan kum 2020 khan India ah mi bo 3,23,170 an awmin a chhut a ni. Human trafficker te hian tun hnaiah Internet leh social media kaltlangin mi tam tak an bum a, an rukbo thin thu sawiin Mizo nu leh pa te pawhin an fate social media hman dan an vil uluk hle a tul a ni, a ti a. Kumin 2022 chhungin Mizoramah human trafficking case pahnih a awm tawh thu Pi Anshu Sharma, NCPCR hian a sawi bawk a ni.  Ramri hrula venhimna thawktute Assam Rifles leh BSF-ten an duty naa harsatna an tawhte pawh tarlan niin sawihona hun tha tak hman zui nghal a ni a. Human trafficking chungchanga awareness campaign leh training neih dan tur ruahmanna pawh siam zui tum a ni.

Vawiin workshop ah hian DCPO, DCPU; Lunglei, Juvenile Justice Board; Child Welfare Committee Lunglei District Chairman leh member dangte; Assam Rifles, BSF, Childline Lunglei, SIB Lunglei hotute,  khawtlang hruaitu leh tlawmngaipawl aiawh, Lunglei khawpui chhung Home hrang hrang enkawltute an tel a ni.