Vawiin khan Excise & Narcotics Conference Hall, Lungleiah Chhimbial Chhantu buatsaihin 'Workshop on Corruption Risk and Prevention' neih niin Lunglei SP Pu C Lalthanmawia'n a hmanpui.

He hunah hian Lunglei SP Pu C Lalthanmawia'n Keynote address pe in eirukna leh hlemhletna do turin mitinin mawhphurhna kan nei theuh a ni tiin hemi chungchang hi a bulthut mahni chhungkua theuh leh zirna inah te ngawrh taka kan inzirtir a tul a ni, a ti a. Kohhran, NGO, zirna school/college te kaltlangin rinawmna leh dikna(integrity) pawimawhna nasa taka kan inzirtir a tul a ni tiin mi dik leh rinawm chawimawi tlak chawimawia, mi pamham diklo taka sum la luta hausa te hi ngaihsan loh leh endawng tura kan in zirtir a tul a ni, a ti a. Eirukna leh hlemhletna do tur chuan hemi chungchang sawihona (dialogue) leh zirhona uar taka kan kalpui zel a tul a ni tiin Workshop tha tak buatsaihtu te chungah lawmthu a sawi a ni.
 
Lunglei SP hian Mizoram sawrkar hnuaia eirukna leh a kaihhnawih en fel tu leh chhui tu Anti-Corruption Bureau (ACB) chungchang sawizauna hun a hmang bawk.

Vawiin program hi Pu Chawngchhuana Chawngthu, Secretary Chhimbial Chhantu in kaihruaiin Rev F. Sangvela'n hunserh a hmang.

Zirhona ah hian Pu Adam Saprinsanga, Editor, The Frontier Despatch - in 'Corruption Scenario in Mizoram' tih thupui hmangin zirtirna pe in Pu J. Miahlung, DLAO Lungleiin 'Corruption Risk and Prevention in Public Sector' tih thupui hmangin zirtirna a pe bawk. Tin, Lunglei CJM Pi Julie Lalrinzami'n 'Prevention of Corruption Act 1988' chungchang kalkhawmte a zirtir a ni.

Workshop hi hlawhtling taka hman niin Lunglei District official-te, kohhran hrang hrang aiawhte, khawtlang hruaitute, tlawmngai pawl hrang hrang aiawhte, zirtirtute leh zirlai thahnem tak an kalkhawm a. Zawhna leh chhanna leh zirhona hun tha tak an hmang bawk a ni.