Vawiin khan Saikuti Hall ah Lunglei District NGO (TI-MSACS) Co-Ordination Committee in World Aids Day 2017 hman a ni. Pu P.C.Lalthanliana, Social Welfare Minister chu khuallian ni in a hmanpui.

World AIDS Day 2017 inkhawm hi Robin Lalrammuana, Asst Secy NGO(TI-MSACS) Co-Ordination Committee in kaihruai in, Khuallian Pu P.C.Lalthanliana chuan World AIDS Day hman hi a lawmawm lova, AIDS leh ruihhlo hi a inkawp tlat a, ruihhlo hi AIDS kai na bulpui ber a ni. Kan kawngka bul ah hian a awm reng a, ruihhlo in a tihbuai loh chhungkua chu tlemte an ni ang a ti. Zofate min tibuaitu ruihhlo tih rem hi sawrkar, kohhran leh  NGO te kut ah dah lovin  kan vai a tan ho a ngaih thu a sawi. Sawrkar in ruihhlo ngai te enkawlna tihchangtlun leh awmze nei zawk a enkawl dan a ngaihtuah a, hnam dang in min run lova, AIDS leh ruihhlo hian min run zawk a ni a ti. AIDS a darhzau loh nan leh a ven nan MLA tin in cheng nuai khat theuh fund an thawh thu a sawi. Tun atanga kan inven chuan kum 10 hnu ah chuan AIDS vei hi kan awm tawh lovang a ti. Sawrkar, NGO te ring lovin mimal in do rawh tiin zirlai te a bik takin a chah a ni.

Pu R.Laltanpuia, Dist Programme Officer NETSU NERO pawhin thu sawi in AIDS hi Khawvel ah kum 1990 ah damdawi khawih thin atangin hmuhchhuah a ni a, kum 1996 ah hmeichhe inzuar atangin hmuhchhuah a ni bawk a ti. Mizoram pum ah thisen test 634201 atangin AIDS vei 15633 hmuhchhuah an ni. Lunglei ah pawh positive 976 register an ni a ti.

Pu Benjamin Lalzama, Addl DC pawhin thu sawi in AIDS leh Cancer natna hi natna hlauhawmber a ni a, AIDS lak ah hian inven lawk theih a ni in ruihhlo leh mipat hmeichhiatna hmang sual lo turin leh nu leh pa thuawih hi fihlimna tha tak a ni a ti.

Pu R.Lalnunthara, President Sub Hqrs YMA, Lunglei chuan leitlangpui a AIDS Day hman a tul ta hi a lungchhiat thlak takzet a ni a ti. YMA in ruihhlo do na leh mipat hmeichhiatna hmang khawlo te lak ah chak taka hmalak a ni a, Lunglei ah hian zirlai tam tak ruihhlo lak a fihlim lo an tam a, nun inthlahdah avangin AIDS a darh chak a, chuvangin zirlaite ruihhlo lak a fihlim turin a chah a ni. Central YMA in ruihhlo ngai AIDS vei a pun loh nan Chhawmdawlna in sak tura hmalak mek a nih thu a sawi. AIDS vei te hi endawng mai lovin tanpui leh chhawmdawltu ni theuh turin a chah a ni.

AIDS vei avanga boral tawh te sun nan Grace Society hmalakna in khawnvar chhit en a ni bawk.