Vawiin chawhma khan Lunglei District Consumer Association (LDCA) buatsaihin Multipurpose Hall, Lunglei Government College ah consumer-te chanvo humhalhna ni ‘World Consumer Rights Day - 2018’ hman a ni a. Lunglei Bawrhsap Pi Lalzarmawii, IAS chuan khuallian niin a hmanpui. Kumin World Consumer Rights Day thupui chu “Making Digital Marketplaces Fairer” niin he Ni puala hun hmanna ah hian Lunglei District chhunga Consumer Association Branch hrang hrang aiawhte, sawrkar official-te leh zirlai thahnem tak an kalkhawm.

Pi Lalzarmawii chuan khawvel hmun dangte rualin Lunglei khawpuiah World Consumer Rights Day puala programme tha tak buatsaih ani chu lawmawm a tih thu sawiin LDCA hruaitute thahnemngaihna chu fakawm a tih thu a sawi a. Consumer te chanvo leh dikna humhalhna kawngah Dan mumal tak Consumer Protection Act 1986 kan nei a, kan chanvo dik tak kan chan theih nan kan zir chian a kan hman tangkai theuh a tul a ni, a ti. Consumer ten an chanvo dik an hmuh theih nan Ukil pawh rawih ngai lovin Court a kal theihna dan a siam a, thiamthu leh lungawi lohna thlenna tur hmun tha tak a duan angin kan hman tangkai a ngai a ni a ti a, kan tanfung tih nghehna turin kan thil leinaah receipt lak te kan uar chhoh deuh deuh a pawimawh hle a ni, a ti bawk.

Vawiin World Consumer Rights Day - 2018’ puala hun hman hi Pu C. Zairemthanga, President, LDCA in kaihruaiin Pu C. Lalremchhunga Associate Professor Lunglei Government College chuan kumin thupui “Making Digital Marketplaces Fairer” hmangin kalkhawmte zirtirna a pe a. Pu JL Hmingthanga, Vice President, LDCA in lawmthu sawiin hun a khar.