Lunglei District Crime Review meeting chu SP Conference Hall Lungleiah neih a ni. He hun hi Pu Lalchhuanthanga Additional SP Lungleiin a kaihruai a, Lunglei SP Pu J. Lalthafamkima chuan sawi hawnna neiin Lungleia Police dinhmun thuamthat mek chung chang a sawi a, DIG Southern Range Quarter tur pawh Venghluna Police Quarter luah tawh loh hmunah changtlung taka sak turin ruahmanna siam mek a ni a ti a, SDPO Quarter hun rei tak atanga la neih theih loh leh Police Guest House te pawh sak turin Sawrkar thlen a ni a ti a, rei loteah a hlawhtlinna hmuh thuai a beisei thu a sawi a ni. Lunglei khawpui chhung hmun engemawzat ah CCTV dah a nih dawn thu leh hei hian pawikhawihna thleng chhui chuah kawngah leh khawpui venhimnaah nasa taka Police te a puih theih tur thu a sawi bawk.

Vawiina Lunglei District Crime review meeting ah hian Kumin January ni 1 atanga March ni 13 inkar a thil thleng te thlir ho a ni a, report in a tarlan danin thubuai 72 ziah luhah 38 te chu charge sheeted an ni a, thubuai 24 chu la khawih loh an ni. Heng zingah hian ruk rukna thubuai 23, inrawkna thubuai 21, Jail tang tlan chhuak 1 te an awm a. Zurui man mi 99 an awmin thih dan pangngai lova thi mi 4 ziah luh an ni bawk. Kumin chhung hian Lirthei khalh dan bawhchhia mante atangin an pawisa chawi cheng 154,150 hmuh a ni tawh a, Ruihtheih thil Ganja Kg 2.185, Whisky bottle 18 leh Rum bottle 16 an man tawh bawk. Nikum 2017 January ni 1 leh Feb ni 30 chhung ve ve khaikhinin kumin hian thubuai 19 zetin a tam tawh zawk a ni. Meeting ah hian Lunglei District chhunga Sub Division leh Police Out Post hrang hranga SDPO leh OC te an tel a ni.

Attachment

  • Loading attachment...