Vawiin khan District Hospital Eye Building, Mamitah World Glaucoma Week, 2018 hman a ni a. Hemi denchhen hian Mamit khawpui chhunga MUP Member-te tan a thlawna mit entirna hun buatsaih a ni.

Programme kaihruaitu Dr. PC Lalliannghaka, District Medical Superintendent chuan kum upa zawkte chu kan ram rohlu an nih avangin Sorkarin a ngaipawimawh hle a ni a ti a. MUP Member mit entir tura kalkhawmte chu lawmthu hrilhin a mamawhte hnenah Tarmit a thlawna an pek dawn thu leh a remchan dan azira an mit bakah an Blood pressure leh Zunthlum an neih leh neih loh-te pawh Test-sak an tum nghal thu a sawi a ni.

Dr.Zothankhuma Chhakchhuak, Chief Medical Officer pawhin thu sawiin Sorkar laipuiin upate a ngaipawimawh em em a. Tunah hian RSBY Scheme hnuaia damlote'n an bill thin, bill theih sang ber RS 30000/- ni thin kha Rs 60000/- ah tihsan a ni tawh a ni a ti. Mamit District chu Aspirational District kan nihna chungchang sawilangin damdawi ina nau nei lova in lama nau neih mai kan ching thin chu a pawi em em a. Kan hnufualna tehna kawngah pawh min tihnufualtu ber a nih thu a sawi. Hmasawnna tehna chi thum chu lehkhathiam, sum thawhchhuah leh damrei hi a ni a. Kan khawtlangah MUP Member kan pun chuan hma kan sawn zel tihna a ni a ti. Mizote hi mote duat lo kan ni a, an raipuar lai pawhin duh anga enkawlna tha an dawng lo fo thin a ni tiin kan mote, kan fanute leh kan tute thlenga an raipuar laia duat a, damdawi in leh Sub Centre-te a hun takah an pan em tih ngaihvenpui thin turin a chah. MUP Member-te chu mahni in chhungkhur theuha thuneitute an nih avangin hriselna kawngah MUP te'n thui takin mawhphurhna kan nei ve a ni a ti bawk.

World Glaucoma Week 2018 thupui atan hian "I mit entir la, Glaucoma lakah i hmuh theih venghim rawh" tih hman a ni.

Dr. TC Hmingthangi, Senior Medical Officer, Mamitin lawmthu sawiin inentirna neih zawm nghal a ni a. MUP Members mi 200 vel en niin an mit bakah an hriselna dang dinhmun BP sang leh Zunthlum an neih leh neih lohte ensak nghal an ni.