Vawiinni khan Government Hrangbana College Seminar Hall ah Sahity Akademi bultum Mizo Academy of Letters leh Mizo Department, Government Hrangbana College buatsaih Two Day National Seminar on Multi Lingual Poets’ Meet leh One day National Seminar on Biate Language chu neih a ni.

He Seminar hawnna Government Hrangbana College Seminar Hall a neihah hi Prof Laltluangliana Khiangte, President, Mizo Academy of Letters leh Head of Department, Mizo, Mizoram University chuan kaihruaiin Dr.Mihir Kumar Sahoo, Programme Officer, SahityaAkademi, Kolkata chuan lawmna hun a hmang a, Darchuailova Renthlei, Financial Secretary, Mizo Academy of Letters chuan inhmelhriattirna hun a hmang bawk. Tin, he hun a khuallian Padma Shri Pu Lalzuia Colney chuan thu sawiin, Mizo tawng vawn nun leh humhim zel pawimawh a tihzia a sawi a. Uar leh zuala Mizo tawng hi kan hman a tul takzet thu leh Mizo tawng chu India ram tawngpui huanga a tel ve ngei a tul thu leh India ram hmun dang atanga rawn kalte chu Mizo tawng hi scheduled language huang a aluh ve theih nan theihtawp chhuahpui turin a sawm bawk.

He huna Keynote Speaker Professor Laltluangliana pawhin hla pawimawhna leh hlaphuahtute dinhmun luah san zia sawiin, kan lungngaihna leh lunglenna tawpa kan belh thin chu hla bawk hi a ni tiin hla pawimawhzia a sawi a. Hla chu khawhar taka kan awmlai pawha hlimna min petu, kan lawmlai pawha nun kawngdik min kawhhmuhtu leh khawvel awm chhunga pawimawh tur a nih avangin he huna rawn kal te pawh hla tak tak phuah zel turin a sawm bawk. He hun hmang tur hian India ram hmun hrang hrang, Gujarat, Goa, Kerala, Assam, Pune, Kolkata, Jamu and Kashmir leh India ram hmun hrang hrang atangin mi thiam leh poet mi 25 vel zet an rawn kal a. He seminar hianni 15- 17 March 2018 thleng a awh dawn a ni.